អាជ្ញាធរសត្វព្រៃ បានបញ្ជាក់ថា ត្រីបាឡែនព្រុយវែង២៨ក្បាល បានងាប់ ហើយជាង១០០ក្បាលផ្សេងទៀត បានត្រឡប់ទៅមហាសមុទ្រវិញ បន្ទាប់ពីពួកវាត្រូវបានគេប្រទះឃើញថាជាប់គាំងខ្លួន នៅឆ្នេរ រដ្ឋ Western Australia ប្រទេសអូស្រាលី កាលពីថ្ងៃព្រហស្បតិ៍។

នៅពេលព្រឹកព្រលឹម ហ្វូងត្រីបាឡែនចំនួន ៤ ក្រុម សរុបចំនួន១៦០ក្បាល បានឡើងមកនៅឆ្នេរសមុទ្រតំបន់រមណីយដ្ឋាន Toby's Inlet ក្បែរទីក្រុង Dunsborough ដែលលាតសន្ធឹងចម្ងាយប្រហែល ៥០០ម៉ែត្រ។

នៅម៉ោងប្រហែល ៤:៤៥នាទី រសៀល ម៉ោងក្នុងស្រុក ក្រសួងជីវចម្រុះ និងអភិរក្ស របស់រដ្ឋ Western Australia (DBCA) បាននិយាយនៅក្នុងការធ្វើច្ចុប្បន្នភាពចុងក្រោយរបស់ខ្លួនថា ត្រីបាឡែនចំនួន ២៨ ក្បាល ក្នុងចំណោមត្រីបាឡែនដែលជាប់គាំងខ្លួនបានងាប់ ខណៈត្រីបាឡែនផ្សេងទៀតបានផ្លាស់ទីចូលទៅសមុទ្រ និងធ្វើដំណើរទៅភាគខាងជើង។

មន្ត្រីនិយាយថា យើងមិនបានឃើញពួកវាទៀតទេ។ យើងសង្ឃឹមថា ពួកវានឹងចេញទៅកន្លែងល្អ ហើយមានជម្រៅទឹកជ្រៅ ដែលពួកវានឹងមិនជាប់គាំងខ្លួនម្តងទៀតឡើយ។ មិនឃើញពួកវា គឺជាសញ្ញាដ៏ល្អ មានន័យថា ពួកវាមិននៅក្នុងទឹករាក់ទេ។

បុគ្គលិកដែលមានបទពិសោធន៍មួយក្រុម កំពុងស្ថិតក្នុងដំណាក់កាលចុងក្រោយនៃការនាំយកត្រីបាឡែនងាប់ចេញពីឆ្នេរ។ សំណាក និងទិន្នន័យ ក៏ត្រូវបានប្រមូលពីថនិកសត្វសមុទ្រ ដើម្បីជួយអ្នកវិទ្យាសាស្ត្រឱ្យស្វែងយល់អំពីដំណើរប្រព្រឹត្តទៅរបស់ពួកវា។