អ្នកនាំពាក្យមន្ទីរបញ្ចកោណ បាននិយាយថា សហរដ្ឋអាមេរិក បានផ្តល់ប្រព័ន្ធមីស៊ីលតាក់ទិចកងទ័ព (ATACMS) រយៈចម្ងាយឆ្ងាយដល់អ៊ុយក្រែនរួចហើយ។
កាលពីខែកុម្ភៈ លោកប្រធានាធិបតី បៃដិន បានដឹកនាំក្រុមមន្ត្រីឲ្យផ្គត់ផ្គង់ប្រព័ន្ធ ATACMS រយៈចម្ងាយឆ្ងាយ ដែលត្រូវបានស្នើរសុំជាយូរមកហើយដោយអ៊ុយក្រែន ដើម្បីវាយប្រហារលើគោលដៅដ៏ជ្រៅរបស់ រុស្ស៊ី ដែលនៅពីក្រោយជួរមុខរបស់សត្រូវនេះ។
មន្ត្រីមន្ទីរបញ្ចកោណ បានបញ្ជាក់ថា ប្រព័ន្ធ ATACMS ទាំងនេះ ត្រូវបានផ្តល់ជូនជាលើកដំបូង ក្នុងកញ្ចប់ទឹកប្រាក់ ៣០០លានដុល្លារ ដែលបានប្រកាសនៅថ្ងៃទី១២ ខែមីនា ហើយបានទៅដល់ប្រទេសអ៊ុយក្រែន ក្នុងខែមេសា។
ពួកគេបានសរសេរនៅក្នុងអ៊ីមែលថា៖«យើងមិនបានប្រកាសថា យើងកំពុងផ្តល់ឲ្យអ៊ុយក្រែននូវសមត្ថភាពថ្មីនេះ នៅពេលនោះ ដើម្បីរក្សាសុវត្ថិភាពប្រតិបត្តិការសម្រាប់អ៊ុយក្រែន តាមសំណើរបស់ពួកគេ»។
ប្រទេសអ៊ុយក្រែន បានប្រើប្រាស់ប្រព័ន្ធ ATACMS រួចហើយ ដើម្បីវាយប្រហារលើអាកាសយានដ្ឋានរុស្ស៊ី នៅគ្រីម៉េ និងតំបន់ដែលរុស្ស៊ីកាន់កាប់ នៅភាគខាងកើតអ៊ុយក្រែន នេះបើយោងតាមសារព័ត៌មានAP។
ព័ត៌មាននេះ កើតមាននៅថ្ងៃតែមួយដែលលោក បៃដិន បានចុះហត្ថលេខាលើច្បាប់ស្តីពីកញ្ចប់ជំនួយសន្តិសុខជាតិ ដែលរួមមានទឹកប្រាក់ប្រហែល ៦១ ពាន់លានដុល្លារសម្រាប់អ៊ុយក្រែន។ រដ្ឋបាលរបស់លោក បៃដិន ក៏បានប្រកាសកញ្ចប់ថវិកាបន្ថែមចំនួន មួយពាន់លានដុល្លារសម្រាប់ទីក្រុងគីវ កាលពីថ្ងៃពុធផងដែរ។