ខណៈវេជ្ជបណ្ឌិតហាត់ការ នៅក្នុងទីក្រុងសេអ៊ូល ធ្វើកូដកម្មប្រឆាំងទៅនឹងផែនការសម្រាប់ការចូលរៀននៅសាលាពេទ្យបន្ថែមទៀត មន្ទីរពេទ្យជាច្រើននៅក្នុងទីក្រុងតូចៗរបស់ប្រទេសកូរ៉េខាងត្បូង បាននិយាយថា មន្ទីពេទ្យកំពុងត្រូវការគ្រូពេទ្យជាច្រើននាក់បន្ថែមទៀត។

កង្វះគ្រូពេទ្យគឺជាកក្តាដ៏សំខាន់នៃផែនការរបស់រដ្ឋាភិបាល ក្នុងការបង្កើនចំនួនសម្រាប់សាលាពេទ្យ ដោយនិស្សិតរាប់ពាន់នាក់ចាប់ផ្តើមនៅឆ្នាំក្រោយ ប៉ុន្តែផែនការនេះបានជួបប្រទះការប្រឆាំងយ៉ាងតឹងតែងពីគ្រូពេទ្យហាត់ការ និងក្រុមគូពេទ្យមួយចំនួនដែលនិយាយថា វានឹងមិនអាចធ្វើឲ្យប្រសើរលក្ខខណ្ឌការងារសម្រាប់គ្រូពេទ្យឡើយ។

ប្រធានមជ្ឈមណ្ឌលវេជ្ជសាស្ត្រទីក្រុងអ៊ីនឈ័ន(Incheon) បានប្រាប់ទីភ្នាក់ងារសារព័ត៌មាន Reuters ថា ខណៈទីក្រុងសេអ៊ូល មានមន្ទីរពេទ្យកម្រិតកំពូល ទីក្រុងតូចៗបានព្យាយាមទាក់ទាញគ្រូពេទ្យ ហើយនិន្នាការនេះត្រូវបានកំណត់ថានឹងកាន់តែអាក្រក់ទៅៗ ដោយសារចំនួនប្រជាជនវ័យចំណាស់របស់កូរ៉េខាងត្បូង និងអត្រាកំណើតទាបបំផុតនៅក្នុងពិភពលោក។

ខណៈវេជ្ជបណ្ឌិតកំពុងគេចពីតំបន់ជនបទ ហើយសម្រុកទៅកាន់ទីក្រុងធំៗ ឬតំបន់រដ្ឋធានីដើម្បីអនុវត្តផ្នែកពេទ្យ ដែលបញ្ហានេះបានលេចចេញជាភារៈកិច្ចបន្ទាន់ ចាំបាច់ត្រូវដោះស្រាយឲ្យបានឆាប់។

លោក យូ ប្យុង សឿន(Yoo Byung-seon) អាយុ ៦៦ ឆ្នាំ ជាអ្នកជំងឺ បាននិយាយថា យើងកំពុងក្លាយជាសង្គមមួយដែលមានមនុស្សវ័យចំណាស់ច្រើនយ៉ាងឆាប់រហ័ស ហើយដោយសារតែបញ្ហានេះ នៅពេលអនាគត មនុស្សកាន់តែច្រើននឹងចូលមន្ទីរពេទ្យ ប៉ុន្តែមានការខ្វះវេជ្ជបណ្ឌិត បើប្រៀបធៀបទៅនឹងប្រទេសជឿនលឿនដទៃទៀត។

ការធ្វើកូដកម្មរបស់គ្រូពេទ្យហាត់ការ ដែលបានចាប់ផ្តើមកាលពីចុងខែកុម្ភៈ ក្នុងការតវ៉ាប្រឆាំងទៅនឹងផែនការរបស់រដ្ឋាភិបាលក្នុងការបង្កើនការចូលរៀននៅសាលាពេទ្យ បង្ហាញសញ្ញាតិចតួចនៃការមានដំណោះស្រាយ។