សហរដ្ឋអាមេរិក និងប្រទេសចំនួន ១៧ផ្សេងទៀត បានទាមទារឲ្យក្រុមហាម៉ាសដោះលែងចំណាប់ថ្នូរ ទាំងអស់ដែលខ្លួនឃុំនៅក្នុងតំបន់ហ្កាហ្សា ខណៈដែលមន្ត្រីរដ្ឋបាលរបស់លោក បៃដិន បានព្យាយាមបង្កើនសម្ពាធជាសកលលើក្រុមសកម្មប្រយុទ្ធ ដែលសេតវិមានបានស្តីបន្ទោសចំពោះការរារាំងកិច្ចព្រមព្រៀងឈប់បាញ់ ដែលនឹងមើលឃើញមានការដោះលែងចំណាប់ថ្នូរ។
សេចក្តីថ្លែងការណ៍រួមនោះ បានឲ្យដឹងថា៖«យើងអំពាវនាវឲ្យមានការដោះលែងជាបន្ទាន់នូវចំណាប់ថ្នូរ ទាំងអស់ ដែលក្រុមហាម៉ាសឃុំខ្លួន នៅតំបន់ហ្កាហ្សាអស់រយៈពេលជាង ២០០ថ្ងៃហើយនោះ។ ពួកគេរួមទាំងពលរដ្ឋរបស់យើងផងដែរ»។ «ជោគវាសនារបស់ចំណាប់ថ្នូរ និងប្រជាជនស៊ីវិល នៅតំបន់ហ្កាហ្សា ដែលត្រូវបានការពារក្រោមច្បាប់អន្តរជាតិ គឺជាការព្រួយបារម្ភរបស់អន្តរជាតិ»។
សេចក្តីថ្លែងការណ៍នោះ ត្រូវបានចុះហត្ថលេខាដោយមេដឹកនាំនៃសហរដ្ឋអាមេរិក អាហ្សង់ទីន អូទ្រីស ប្រេស៊ីល ប៊ុលហ្គារី កាណាដា កូឡុំប៊ី ដាណឺម៉ាក បារាំង អាល្លឺម៉ង់ ហុងគ្រី ប៉ូឡូញ ព័រទុយហ្គាល់ រូម៉ានី ស៊ែរប៊ី អេស្ប៉ាញ ថៃ និងចក្រភពអង់គ្លេស។
សេចក្តីថ្លែងការណ៍នោះ បានបន្តថា៖ «យើងសង្កត់ធ្ងន់ថា កិច្ចព្រមព្រៀងដែលត្រូវបានពិភាក្សា ដើម្បីដោះលែងចំណាប់ថ្នូរ នឹងនាំមកនូវបទឈប់បាញ់ភ្លាមៗនិងអូសបន្លាយ នៅក្នុងតំបន់ហ្កាហ្សា ដែលនឹងជួយសម្រួលដល់ការកើនឡើងនៃជំនួយមនុស្សធម៌ចាំបាច់បន្ថែមត្រូវបានផ្តល់ឲ្យនៅទូទាំងតំបន់ហ្កាហ្សា និងនាំទៅដល់ការបញ្ចប់អរិភាពដ៏គួរឲ្យទុកចិត្តបាន។ «ប្រជាជនហ្កាហ្សា នឹងអាចត្រឡប់ទៅផ្ទះសម្បែង និងទឹកដីរបស់ពួកគេវិញ ជាមួយនឹងការត្រៀមលក្ខណៈជាមុន ដើម្បីធានាបាននូវទីជម្រក និងលក្ខខណ្ឌមនុស្សធម៌ផ្សេងៗ»។