វេទិកាបណ្ដាញសង្គម X របស់លោក Elon Musk បានការពារការបង្ហោះដែលបង្ហាញពីសង្ឃជាន់ខ្ពស់កាតូលិក នៅប្រទេសអូស្ត្រាលី ត្រូវបានចាក់អំឡុងពេលផ្ដល់ឱវាទ ដោយផ្ដល់ហេតុផលថា នេះជា «ផ្នែកនៃកិច្ចពិភាក្សាសាធារណៈ» ដោយបដិសេធបញ្ជារបស់និយតករឲ្យដកចេញខ្លឹមសារនេះ ព្រោះយល់ថា រូបភាពនោះជាការប្រមាថ និងមានលក្ខណៈហិង្សា។

តាមរយៈការបង្ហោះនាពេលយប់របស់ខ្លួន គណនី «កិច្ចការគ្រប់គ្រងសកល» របស់បណ្តាញងសង្គម X បានឲ្យដឹងថា វីដេអូដែលថតដោយ «អ្នកឃើញហេតុការណ៍មិនដឹងរឿង» មិនគួរត្រូវបានហាមឃាត់នោះទេ ក្រោមច្បាប់របស់ប្រទេសអូស្ត្រាលី ដែល «អនុញ្ញាតឲ្យមានខ្លឹមសារ ដែលអាចចាត់ទុកថា ជាផ្នែកនៃការពិភាក្សា ឬការពិភាក្សាជាសាធារណៈ»។

គណនីរបស់បណ្តាញសង្គម X បានលើកឡើងថា៖«ខ្លឹមសារក្នុងការបង្ហោះ មិនលើកទឹកចិត្ត ឬបង្កអំពើហិង្សាទេ»។ សេចក្តីថ្លែងការណ៍របស់ក្រុមហ៊ុនដែលពីមុនហៅថា Twitter ដែលមហាសេដ្ឋីលោក Musk បានទិញនៅឆ្នាំ២០២២ ជំទាស់ជាមួយសមាជិកសភាអូស្ត្រាលី ដែលអះអាងថា នគរបាលភ័យខ្លាចថា វីដេអូនេះ នឹងត្រូវប្រើដើម្បីលើកទឹកចិត្តមនុស្សឲ្យចូលរួមជាមួយក្រុមភេរវករ។

អ្នកគ្រប់គ្រងសុវត្ថិភាពអេឡិចត្រូនិក បានបញ្ជាឲ្យបណ្តាញសង្គម X ដកការបង្ហោះដែលមានវីដេអូជាសកល ដើម្បីបញ្ឈប់ប្រជាជនអូស្ត្រាលីមិនឲ្យមើលឃើញវីដេអូទាំងនោះ ប៉ុន្តែបណ្តាញសង្គម X បានជំទាស់នឹងការបញ្ជានេះ ដោយលើកផលហេតុផលថា ជា «យុត្តាធិការជ្រុលហួសហេតុ»។

នៅសប្តាហ៍នេះ តុលាការ បានតម្កល់ដីកាបញ្ជាឲ្យដកចេញនោះ ជាបណ្ដោះអាសន្ន រហូតដល់មានសវនាការ នៅថ្ងៃទី១០ ខែឧសភា៕