ពោធិ៍សាត់៖ ព្រឹកថ្ងៃទី២៦ ខែមេសា ឆ្នាំ២០២៤ សមាជិករដ្ឋសភា និងជា​អ្នកតំណាង​រាស្ត្រ​មណ្ឌល​ខេត្តពោធិ៍សាត់មកពីគណបក្សប្រជាជនកម្ពុជា រួមមានឯកឧត្តម ស៊ុយ សែម, ឯកឧត្តម ទី ថានី និង ឯកឧត្តម រ៉ូហ្វី អូស្មាន បានអញ្ជើញជួបសំណេះសំណាល សួរសុខទុក្ខ ជាមួយ​បងប្អូន​ប្រជាពលរដ្ឋក្នុងឃុំតាលោ ស្រុកតាលោសែនជ័យ ដើម្បីដឹងសុខដឹងទុក្ខគ្នាទៅវិញទៅមក ព្រមទាំង​ក្ដាប់ព័ត៌មាននៅថ្នាក់មូលដ្ឋាន រាយការណ៍ជូនទៅថ្នាក់លើ ឲ្យបានដឹង អំពីស្ថាន​ភាព​ជីវភាព​រស់​នៅរបស់ប្រជាពលរដ្ឋ។ ពិធីនេះប្រារព្ធធ្វើនៅវត្តតាលោ ដោយមានប្រជាពលរដ្ឋ អាជ្ញាធរ​មូលដ្ឋាន និងមន្ត្រីជារការចូលរួមសរុបប្រមាណ៣៥០នាក់ ។

ឯកឧត្តម ស៊ុយ សែម មានប្រសាសន៍ថា ថ្ងៃនេះយើងជួបជុំគ្នា មានទាំងមេឃុំ មេភូមិ ចាស់​ព្រឹទ្ធាចារ្យ លោកតាលោកយាយ គ្រូបង្រៀន គ្រូពេទ្យ នគរបាលប៉ុស្ដិរដ្ឋបាល យុវជន និង​ប្រជា​ពលរដ្ឋគ្រប់ភូមិក្នុងឃុំតាលោ ដើម្បីដឹងសុខដឹងទុក្ខគ្នាទៅវិញទៅមក ហើយ​ក៏​ជា​វេទិកា​សាធារណៈ​​មួយ​មិនប្រកាន់និន្នាការនយោបាយ ដោយ​បើក​ចំហរ​ឲ្យ​បង​ប្អូន​លើក​ឡើង​នូវ​បញ្ហា​ប្រឈម​​នានា ជាក្ដីកង្វល់ ឬជាសំណូមពរ ដែលបងប្អូនជួបប្រទះក្នុងមូលដ្ឋានរបស់ខ្លួន ដើម្បី​ឲ្យ​ក្រុម​​តំណាងរាស្ត្របានដឹង កត់ត្រាទុកបញ្ជូនទៅថ្នាក់លើ រកដំណោះស្រាយជូន។

ក្នុងនោះដែរប្រជាពលរដ្ឋបានលើកឡើងថា បច្ចុប្បន្ន​នេះ​ប្រទេស​ជាតិ​យើង​មាន​សុខ​សន្តិភាព​យ៉ាង​ល្អ​ប្រសើរ រស់នៅដោយមិនភ័យព្រួយពីភ្លើងសង្គ្រាមដូចពីជំនាន់មុនៗ ហើយ​ប្រទេស​ជាតិ​កំពុង​មាន​ការ​អភិវឌ្ឍលើគ្រប់វិស័យ យើងមានតែផលលំបាក់ខ្លះៗមួយចំនួនក្នុងជីវភាពរស់ប្រចាំថ្ងៃ ដូច​ជា​ក្នុងឆ្នាំនេះអាកាសធាតុក្ដៅខ្លាំងណាស់ ទឹកស្ទឹង ត្រពាំងបឹងបួរ រីងស្ងួតហួតហែងគ្មានសល់ បណ្ដាល​ឲ្យជួបបញ្ហាខ្វះទឹកប្រើប្រាស់ប្រចាំថ្ងៃ ទាំងមនុស្ស សត្វ និងការដាំដំណាំបន្លែផ្សេង។ ប្រជាពលរដ្ឋតាមភូមិនីមួយៗ ក៍បានលើកឡើងអំពីបញ្ហាខ្វះផ្លូវធ្វើដំណើរ ប្រឡាយទឹក អណ្ដូងទឹក ស្រះទឹក ខ្វះឯកសណ្ឋានប្រជាការពារ មណ្ឌលសុខភាពលិចទឹកពេលភ្លៀងម្ដងៗនារដូវវស្សា ដែល​ត្រូវ​ការចាក់ដីបំពេញទីធ្លា ។ ឯកឧត្តម ស៊ុយ សែម មានប្រសាសន៍ថា ក្នុង​នាម​ជា​អ្នក​តំណាង​រាស្ត្រ គឺមកស្ដាប់ កត់ត្រា ទាំងសុខ និងទុក្ខរបស់ប្រជាពលរដ្ឋក្នុងមូលដ្ឋាន យកទៅ​ឱ្យ​ស្ថាប័ន​ដែល​មានសមត្ថកិច្ច ឬអាជ្ញាធរដែនដី ពិនិត្យដោះស្រាយ និងអន្តរាគមន៍ជូន។ ចំពោះ​បញ្ហា​ខ្វះ​ខាត​ទឹកសម្រាប់មនុស្ស សត្វ និងវិស័យកសិកម្ម ជាបញ្ហាខ្លាំងបំផុត ហើយ​ឯកឧត្តម​នឹង​ជួប​ពិភាក្សា​ជាមួយឯកឧត្តមអភិបាលខេត្ត ដើម្បីរកវិធីដោះស្រាយជាបន្ទាន់។ ឯកឧត្តមបានបកស្រាយនិងពន្យល់ណែនាំ ដល់បងប្អូនប្រជាពលរដ្ឋ នូវបញ្ហានិងសំណូមពរ ដែល​បានលើកឡើងទាំងប៉ុន្មាន ព្រមទាំងបានជូនថវិកាចំនួន៣លានរៀល ចូល​រួម​ចាក់​ដី និង​ទិញ​ទឹក​ប្រើប្រាស់ ក្នុងមណ្ឌលសុខភាពតាលោ និង១លានរៀលទៀតសម្រាប់វត្តតាលោ។ ហើយ​ប្រជា​ពលរដ្ឋ និងអ្នកបានមកចូលរួមជិត៣៥០នាក់ ឯកឧត្តមបានជូនថ្នាំពេទ្យ ម្នាក់​៣០​គ្រាប់​ផង​ដែរ៕