នៅត្រីមាសទី១ នៃឆ្នាំ២០២៤ សេដ្ឋកិច្ចអាមេរិកបានកើនឡើងក្នុងល្បឿនយឺតបំផុត ក្នុងរយៈពេល ២ឆ្នាំ ខណៈពេលដែលអតិផរណាបានកើនឡើង។

ក្រសួងពាណិជ្ជកម្ម បានឲ្យដឹងកាលពីថ្ងៃព្រហស្បតិ៍ (ទី២៥ ខែមេសា) ថា ផលិតផលក្នុងស្រុកសរុប (GDP) បានកើនឡើង ១,៦ភាគរយ ក្នុងត្រីមាសទី១ ដែលទាបជាងការព្យាករណ៍របស់អ្នកសេដ្ឋកិច្ច។ ហើយកម្រិតនេះក៏តិចជាងពាក់កណ្តាលនៃការព្យាការណ៍អត្រា ៣,៤ភាគរយ នៅក្នុងត្រីមាសទី៤ ផងដែរ។

ក្រសួងពាណិជ្ជកម្មក៏បានបង្ហាញដែរថា រង្វាស់នៃអតិផរណា ដែលហៅថា ការចំណាយលើការប្រើប្រាស់ផ្ទាល់ខ្លួន ឬ PCE ពោលដែលជាសន្ទស្សន៍តម្លៃមិនរាប់បញ្ចូលតម្លៃអាហារ និងថាមពលនោះ បានហក់ឡើងដល់អត្រា ៣,៧ភាគរយ នៅត្រីមាសទី១ ដែលលើសពីគោលដៅ ២ភាគរយ របស់ធនាគារគណ្ដាល (Fed)។ ការហក់ឡើងនេះបានពង្រឹងដល់ការរំពឹងទុក ដែល Fed នឹងមិនកាត់បន្ថយអត្រាការប្រាក់ នៅមុនខែកញ្ញា។

ការចំណាយខ្ពស់លើតម្លៃលំនៅឋាន បានរួមចំណែកដល់ការហក់ឡើងតម្លៃនេះ ប៉ុន្តែនៅក្នុងបទសម្ភាសន៍ផ្តាច់មុខជាមួយសារព័ត៌មាន Reuters រដ្ឋមន្ត្រីក្រសួងរតនាគារ លោកស្រី Janet Yellen បាននិយាយថា លោកស្រីគិតថា ការឡើងនេះបានឈានដល់កម្រិតខ្ពស់បំផុតហើយ។

បើយោងតាម CME FedWatch Tool បានឲ្យដឹងថា បច្ចុប្បន្ន ពាណិជ្ជករមើលឃើញពីឱកាស ៦០ភាគរយនៃការកាត់បន្ថយអត្រាការប្រាក់ នៅឯកិច្ចប្រជុំខែកញ្ញារបស់ Fed ដោយចំនួននេះធ្លាក់ចុះពីការរំពឹងទុក ៧០ភាគរយ កាលពីថ្ងៃពុធ (ទី២៤ ខែមេសា)៕