ភ្នំពេញ ៖ រដ្ឋបាលរាជធានីភ្នំពេញបានសម្រេចរៀបចំឲ្យមានផ្លូវថ្មើរជើង និងមានហាងទំនិញ ភោជនីយដ្ឋាន សណ្ឋាគារ រួមទាំងបារផងដែរ ដើម្បីបង្កើតជា pub street ដ៏ទាក់ទាញ និងពេញនិយមសម្រាប់អ្នកទេសចរណ៍នាពេលរាត្រី។

ផ្លូវថ្មើរជើងរាជធានីភ្នំពេញ ដែលមានទំហំដល់ទៅ ៥៧ហិកតា ក្នុងភូមិសាស្ត្រខណ្ឌដូនពេញ នឹងត្រូវបានរៀបចំបង្កើតឡើង ដែលមានទាំងហាងទំនិញ ភោជនីយដ្ឋាន សណ្ឋាគារ និងបារផងដែរនោះ គឺនឹងក្លាយជា pub street ហើយគ្រោងនឹងរៀបចំឡើងនៅដើមខែឧសភា ឆ្នាំ២០២៤នេះ ដើម្បីបំរើឲ្យភ្ញៀវជាតិ និងអន្តរជាតិបានដើរកម្សាន្ត និងទិញទំនិញនាពេលយប់ ដែលគម្រោងនេះនឹងរៀបចំឲ្យបានរួចរាល់នៅមុនចូលឆ្នាំសកល ឆ្នាំ២០២៥ខាងមុខ។ នេះបើតាមការបង្ហាញក្នុងកិច្ចប្រជុំស្តីពីការងាររៀបចំផ្លូវថ្មើរជើងមុខប៉ុស្តិ៍ប្រៃសណីយ៍កម្ពុជា ស្ថិតក្នុងសង្កាត់វត្តភ្នំ ខណ្ឌដូនពេញ ក្រោមអធិបតីភាព ឯកឧត្តម ឃួង ស្រេង អភិបាលរាជធានីភ្នំពេញ នារសៀលថ្ងៃទី២៦ ខែមេសា ឆ្នាំ២០២៤ នៅសាលារាជធានីភ្នំពេញ។

លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានឲ្យដឹងថា ផ្លូវថ្មើរជើងរាជធានីភ្នំពេញ ត្រូវបានបែងចែងជា ៣តំបន់ មានទំហំ ៥៧ហិកតា ដោយផ្លូវថ្មើរជើងតំបន់ទី១ មានទីតាំងនៅមុខប្រៃសណីយ៍ មានព្រំប្រទល់ខាងជើងជាប់ផ្លូវលេខ៩៤ ខាងត្បូងជាប់ផ្លូវលេខ១០៦ ខាងលិចជាប់ផ្លូវលេខ១៣ ខាងកើតជាប់តិរិវិថីព្រះស៊ីសុវត្ថិ ដោយតំបន់នេះនឹងរៀបចំឡើងជាតំបន់វិថីម្ហូបអាហារ និងហាងទំនិញ។ ផ្លូវថ្មើរជើងតំបន់ទី២ មានព្រំប្រទល់ខាងជើងជាប់ផ្លូវលេខ ១០៦ ខាងត្បូងជាប់ផ្លូវលេខ ១៨៤ ខាងលិចជាប់ផ្លូវលេខ១៣ ខាងកើតជាប់តិរិវិថីព្រះស៊ីសុវត្ថិ ដោយតំបន់នេះរៀបចំជាតំបន់ pub street ។ សម្រាប់ផ្លូវថ្មើជើងតំបន់ទី៣ មានព្រំប្រទល់ខាងជើងជាប់ផ្លូវលេខ ១៨៤ ខាងត្បូងជាប់មហាវិថីព្រះសីហនុខាងលិចជាប់ផ្លូវលេខ០៧ ខាងកើតជាប់តិរិវិថីព្រះស៊ីសុវត្ថិ ដោយរៀបចំជាតំបន់លំហែកាយ។

លោក សាំ ពិសិដ្ឋ បញ្ជាក់ថា តំបន់ទាំង៣នេះរដ្ឋបាលរាជធានីភ្នំពេញនឹងរៀបចំឡើងឲ្យមានសោភណ្ឌភាពស្រស់បំព្រង ជាតំបន់បៃតង មានសួនច្បារ តាំងភ្លើងចម្រុះពណ៌ មានបង្គន់អនាម័យ ចំណតយានយន្តបណ្តោះអាសន្ន មានហាងទំនិញ ភោជនីយដ្ឋាន សណ្ឋាគារ បារ និងជាតំបន់ pub street ផងដែរ។ តំបន់នេះក្រោយការរៀបចំរួចនឹងបើកឲ្យភ្ញៀវជាតិ និងអន្តរជាតិចូលទិញទំនិញ និងកំសាន្តសប្បាយ ចាប់ពីម៉ោង៦ល្ងាចដល់ម៉ោង១១យប់។

ឯកឧត្តម ឃួង ស្រេង ក្នុងកិច្ចប្រជុំនោះបានលើកឡើងថា គម្រោងនេះជំនាញបានសិក្សារួចអស់ហើយ ដូច្នេះឯកឧត្ដមជំរុញឲ្យមន្ទីរសាធារណការ និងដឹកជញ្ជូនរាជធានីភ្នំពេញចាប់ផ្តើមអនុវត្តការងាររៀបចំគម្រោងនេះ ចាប់ពីពេលនេះតទៅ ដោយប្រើប្រាស់ពេលវេលា៦ខែ ពោលគឺឲ្យរួចរាល់នៅមុនចូលឆ្នាំសកលឆ្នាំ២០២៥ ដើម្បីឲ្យតំបន់នេះក្លាយជាតំបន់កម្សាន្តនាពេលរាត្រីដ៏ពេញនិយមមួយ ៕

អត្ថបទ ៖ ប្រាក់ វ៉ាន់ដា