វៀតណាម៖ ក្រុមអាជ្ញាធរបាននិយាយនៅថ្ងៃនេះថា ទីក្រុងធំៗនៅក្នុងប្រទេសវៀតណាមអាចបន្ថែមពេលវេលា ឬរឹតបន្តឹងចលនាប្រជាពលរដ្ឋដើម្បីទប់ស្កាត់ការឆ្លងរាលដាលវីរុស Covid-19 ខណៈករណីឆ្លងប្រចាំថ្ងៃថ្មីបានកើនឡើងលើសពី ៦.០០០នាក់ក្នុងរយៈពេល ៧ថ្ងៃជាប់ៗគ្នា។
បន្ទាប់ពីការទប់ស្កាត់វីរុសនេះបានដោយជោគជ័យ សម្រាប់ជំងឺរាតត្បាតសកលនេះ ភាគច្រើនប្រទេសវៀតណាមបានប្រឈមនឹងរលក នៃការឆ្លងខ្ពស់បំផុតប្រចាំថ្ងៃចាប់តាំងពីការផ្ទុះឡើងកាលពីចុងខែមេសា។ ប្រទេសវៀតណាមបានរាយការណ៍ករណីឆ្លងថ្មីវីរុសនៃ Covid-19 ចំនួន ៦.៥៥៩នាក់កាលពីថ្ងៃពុធ ដែលនាំឲ្យចំនួនឆ្លងសរុបរបស់ប្រទេសនេះចាប់តាំង ពីការចាប់ផ្តើមផ្ទុះជំងឺរាតត្បាតសកលកើនឡើងដល់ជាង ១២០,០០០នាក់។ យោងតាមទិន្នន័យជាផ្លូវការប្រជាជនប្រហែល ៤៥០.០០០នាក់នៅក្នុងប្រទេសដែលមានប្រជាជនជាង ៩៨លាននាក់មួយនេះបានទទួលវ៉ាក់សាំងពេញលេញ ឬគ្រប់ដូស។
ប្រទេសវៀតណាមបានកត់ត្រាអ្នកឆ្លងថ្មីនៃវីរុស Covid-19 ចំនួន២.៨២១នាក់នៅព្រឹកថ្ងៃព្រហស្បតិ៍នេះ ដែលនាំឲ្យចំនួនអ្នកឆ្លងសរុបនៅប្រទេសនេះកើនឡើងដល់ ១២៣.៦៤០នាក់ និងអ្នកស្លាប់សរុបចំនួន ៦៣០នាក់បន្ទាប់ពីបានកត់ត្រាអ្នកស្លាប់ថ្មីចំនួន ១០៦នាក់។ រដ្ឋាភិបាលបានអនុវត្តវិធានការរឹតត្បិតនានាយ៉ាងតឹងរ៉ឹង លើចលនាប្រជាជនប្រហែលមួយភាគបីនៃប្រទេសអាស៊ីអាគ្នេយ៍ដ៏ធំមួយនេះ ដែលរួមមានមជ្ឈមណ្ឌលពាណិជ្ជកម្មហូជីមិញនៅភាគខាងត្បូង និងរដ្ឋធានីហាណូយនៅភាគខាងជើង៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
