លោក Donald Trump ត្រៀមខ្លួនរួចជាស្រេចក្នុងការបន្តសម្ព័ន្ធភាពអភិរក្សនិយមជាមួយនាយករដ្ឋមន្ត្រីជាតិនិយមហុងគ្រី លោក Viktor Orban ដោយការលើកឡើងបែបនេះរបស់បេក្ខជនប្រធានាធិបតីនៃគណបក្សសាធារណរដ្ឋមានក្នុងសារវីដេអូមួយ នាថ្ងៃសុក្រ (២៦ មេសា) នេះ។

គួរបញ្ជាក់ថា លោក Orban គឺជាម្នាក់ក្នុងចំណោមសម្ព័ន្ធមិត្តដ៏ជិតស្និទ្ធបំផុតរបស់លោក Trump នៅតំបន់អឺរ៉ុប។ ការអត្ថាធិប្បាយរបស់អតីតប្រធានាធិបតីសហរដ្ឋអាមេរិក បានធ្វើឲ្យបណ្ដាមេដឹកនាំនៃបណ្ដាប្រទេសរបស់ប្លុកនេះមានក្ដីបារម្ភ បន្ទាប់ពីបានលើកឡើងថា លោកនឹងមិនការពារប្រទេសដែលមិនបានបំពេញតាមការសន្យា ជុំវិញការចំណាយលើការការពារជាតិរបស់អង្គការណាតូ។

ការឈ្នះតំណែងប្រធានាធិបតីថ្មីរបស់លោក Trump អាចជួយសម្រាលភាពតានតឹងនៃទំនាក់ទំនងរបស់សហរដ្ឋអាមេរិក ជាមួយប្រទេសហុងគ្រីដែលត្រូវបានទីក្រុងវ៉ាស៊ីនតោនរិះគន់ពីការមានការទំនាក់ទំនងជិតស្និទ្ធជាមួយរុស្ស៊ី និងពីការមានចេតនាមិនផ្ដល់សច្ចាប័នដល់ការចូលជាសមាជិកអង្គការណាតូរបស់ប្រទេសស៊ុយអែត ដែលនៅទីបំផុត ទីក្រុង Budapest បានយល់ព្រមកាលពីខែកុម្ភៈនោះ។

សាររបស់លោក Trump នេះ ត្រូវបានចាក់ផ្សាយនៅក្នុងសន្និសីទសកម្មភាពនយោបាយអភិរក្សនិយម (CPAC) ដែលជាការជួបជុំក្រុមអភិរក្សនិយមដ៏លេចធ្លោបំផុតរបស់សហរដ្ឋអាមេរិក នៅទីក្រុង Budapest ដោយនេះគឺជាការប្រារព្ធព្រឹត្តិការណ៍ CPAC បែបនេះលើកទី៣ នៅក្នុងប្រទេសហុងគ្រី៕