រដ្ឋាភិបាលវៀតណាម នៅថ្ងៃសុក្រ (ទី២៦ ខែមេសា) នេះ បានឲ្យដឹងថា ប្រធានសភា លោក Vuong Dinh Hue បានលាលែងពីតំណែង ដោយសារ «ការរំលោភបំពាន និងកង្វះខាត» របស់លោក ដោយនេះជាសញ្ញាថ្មីនៃភាពចលាចលផ្នែកនយោបាយដែលកើតមានឡើងត្រឹមតែប៉ុន្មានសប្តាហ៍ប៉ុណ្ណោះ បន្ទាប់ពីមានការបញ្ចប់ដ៏ល្បីសុះសាយនូវតំណែងប្រធានាធិបតីរបស់ប្រទេសនេះ។

ប្រធានសភា គឺស្ថិតក្នុងចំណោម «សសរស្តម្ភ» ទាំង៤ នៃការដឹកនាំនៅប្រទេសវៀតណាម ដែលជាផ្លូវការមិនមានមេដឹកនាំណាសំខាន់ជាងគេនោះឡើយ។ លោក Hue ដែលមានវ័យ ៦៧ឆ្នាំ ទទួលបានការលើកតម្កើងថា ជាបេក្ខជនអាចទទួលបានតំណែងលេខាបក្សកុម្មុយនីស្ត ដែលជាតួនាទីដ៏មានឥទ្ធិពលបំផុតរបស់វៀតណាម។

តាមរយៈសេចក្តីថ្លែងការណ៍របស់គណៈកម្មាធិការមជ្ឈិមបក្សកុម្មុយនីស្ត គេហទំព័ររបស់រដ្ឋាភិបាល បានឲ្យដឹងថា៖ «ការបំពាន និងកង្វះខាតរបស់សមមិត្ត Vuong Dinh Hue បានបង្កឲ្យមានមតិសាធារណៈអវិជ្ជមាន ដែលធ្វើឲ្យប៉ះពាល់ដល់កេរ្តិ៍ឈ្មោះរបស់បក្ស រដ្ឋ និងខ្លួនលោកផ្ទាល់»។

សេចក្តីថ្លែងការណ៍បានលើកឡើងថា ការលាលែងពីតំណែងរបស់លោកត្រូវបានទទួលយក ហើយនឹងត្រូវដកចេញពីគណៈកម្មាធិការមជ្ឈិមបក្ស និងការិយាល័យនយោបាយដ៏មានឥទ្ធិពល។ តែយ៉ាងណាក្ដី មិនមានការបញ្ជាក់ច្បាស់លាស់ថា តើការបំពាននោះមានអ្វីខ្លះ។

គួរបញ្ជាក់ថា ការលាលែងរបស់លោក Hue កើតឡើងតែប៉ុន្មានថ្ងៃប៉ុណ្ណោះបន្ទាប់ពីមានការប្រកាសថា ជំនួយការរបស់លោកត្រូវបានចាប់ខ្លួនពីបទស៊ីសំណូក ពាក់ព័ន្ធនឹងក្រុមហ៊ុនហេដ្ឋារចនាសម្ព័ន្ធ។

នៅក្រោមយុទ្ធនាការប្រឆាំងអំពើពុករលួយអស់រយៈពេលជាច្រើនឆ្នាំ មន្ត្រីរដ្ឋជាន់ខ្ពស់រាប់រយនាក់ និងនាយកប្រតិបត្តិក្រុមហ៊ុនល្បីៗជាច្រើនរូប ត្រូវបានកាត់ទោស ឬបង្ខំឲ្យចុះចេញពីតំណែង។ កាលពីដើមខែមេសា មហាសេដ្ឋីអចលនទ្រព្យ លោកស្រី Truong My Lan ត្រូវបានកាត់ទោសប្រហារជីវិតដោយសារតួនាទីរបស់លោកស្រីក្នុងការក្លែងបន្លំហិរញ្ញវត្ថុរាប់ពាន់លានដុល្លារ ដែលបានបន្តដំណើរការអស់រយៈពេលជាច្រើនឆ្នាំ ដោយមន្ត្រីជាន់ខ្ពស់ជាច្រើនរូបមិនដឹងមិនឮ៕