មន្ត្រីអង្គការសហប្រជាជាតិ (UN) នៅថ្ងៃសុក្រ (២៦ មេសា) នេះ បាននិយាយថា វាអាចចំណាយពេលប្រមាណជា ១៤ឆ្នាំ ដើម្បីកាយយកកម្ទេចកម្ទីដ៏ច្រើនសន្ធឹកសន្ធាប់ នៅតំបន់ហ្កាហ្សាស្ទ្រីប ក្នុងនោះរួមមានទាំងអាវុធយុទ្ធភណ្ឌមិនទាន់ផ្ទុះដែលបន្សល់ទុកដោយសង្គ្រាមបំផ្លិចបំផ្លាញរបស់អ៊ីស្រាអែលផងដែរ។

យុទ្ធនាការយោធារបស់អ៊ីស្រាអែលប្រឆាំងនឹងក្រុមអ៊ីស្លាមនិយមប៉ាឡេស្ទីន ដែលកំពុងកាន់អំណាចនៅតំបន់ហ្កាហ្សា គឺក្រុមហាម៉ាស បានធ្វើឲ្យដែនដីដ៏តូចចង្អៀតដែលមានប្រជាជនចំនួន ២,៣លាននាក់ ទៅជាវាលរហោឋាន ដោយនាំឲ្យជនស៊ីវិលភាគច្រើនគ្មានផ្ទះសម្បែង អត់ឃ្លាន និងប្រឈមជាមួយជំងឺ។

អំឡុងសន្និសីទនៅទីក្រុងហ្សឺណែវ ប្រទេសស្វីស លោក Pehr Lodhammar ដែលជាមន្ត្រីជាន់ខ្ពស់នៅការិយាល័យគ្រប់គ្រងសកម្មភាពកំចាត់មីនរបស់អង្គការសហប្រជាជាតិ (UNMAS) បានប្រាប់ថា សង្រ្គាមបានបន្សល់ទុកនូវកម្ទេចកម្ទីប្រមាណ ៣៧លានតោន នៅក្នុងដែនដីដែលមានប្រជាជនរស់នៅយ៉ាងណែនណាន់តាន់តាប់នេះ។

លោកបាននិយាយថា ទោះបីជាវាមិនអាចកំណត់ចំនួនពិតប្រាកដនៃអាវុធយុទ្ធភណ្ឌមិនទាន់ផ្ទុះដែលបានរកឃើញនៅក្នុងតំបន់ហ្កាហ្សាក៏ដោយ ប៉ុន្តែវាត្រូវបានព្យាករថា អាចចំណាយពេលយ៉ាងហោចណាស់ ១៤ឆ្នាំក្រោមលក្ខខណ្ឌមួយចំនួន ដើម្បីបោសសម្អាតកម្ទេចកម្ទី ក្នុងរួមទាំងគំនរបាក់បាក់របស់អគារដែលត្រូវបានបំផ្លាញផងដែរ។

គួរបញ្ជាក់ថា បើយោងតាមក្រសួងសុខាភិបាលរបស់ហ្កាហ្សា បានឲ្យដឹងថា យ៉ាងហោចណាស់មានជនជាតិប៉ាឡេស្ទីនចំនួន ៣៤.៣០៥នាក់ ត្រូវបានសម្លាប់ និង ៧៧.២៩៣នាក់ បានរងរបួស នៅក្នុងការវាយប្រហាររបស់យោធាអ៊ីស្រាអែលលើតំបន់ហ្កាហ្សា គិតចាប់តាំងពីថ្ងៃទី៧ ខែតុលាមក៕