បាល់ទាត់៖ លោក អ៊ួន ឧត្តម អគ្គលេខាធិការក្លិបអធិរាជដំរីឦសាន ខេត្តរតនាគិរីបានអះអាងថា ដោយសារបញ្ហាកូវីដ-១៩ ទើបធ្វើឲ្យក្រុមលោកឯកភាពគ្នាដកខ្លួនពីការប្រកួតពានរង្វាន់សម្ដេចតេជោ ហ៊ុន សែន ថ្នាក់ខេត្តលើកទី១៥ ឆ្នាំ២០២១ ដែលនឹងត្រូវបន្ដការប្រកួតឡើងវិញនាថ្ងៃទី០៣ ខែសីហាខាងមុខ។
អគ្គលេខាធិការក្លិបរូបនេះបញ្ជាក់ថា អំឡុងពេលរីករាលដាលខ្លាំងនៃជំងឺកូវីដ-១៩ ក្រុមខ្លួនមិនបានប្រមូលផ្ដុំហ្វឹកហាត់ ហើយកីឡាករខ្លះអត់ទាន់បានចាក់វ៉ាក់សាំង។ ម្យ៉ាងលក្ខខណ្ឌនៃការប្រកួតថ្មី ក្រុមនីមួយៗមានទំនួលខុសត្រូវកាន់តែខ្ពស់ ហេតុនេះទើបធ្វើឲ្យក្រុមអធិរាជដំរីឦសាន ខេត្តរតនាគិរី ត្រៀមខ្លួនមិនទាន់ជាមួយការប្រកួតក្រោមរបត់ថ្មីនេះ ហើយឈានដល់ការសម្រេចចិត្តដកខ្លួនតែម្ដង។ សូមបញ្ជាក់ថា ក្រុមអធិរាជដំរីឦសាន ខេត្តរតនាគិរី គឺជាបេក្ខភាពប្រកួតប្រជែងក្នុងពូល F ជាមួយខេត្តត្បូងឃ្មុំ និងខេត្តព្រះវិហារ។ ប៉ុន្តែបច្ចុប្បន្នពូលនេះ នៅសល់តែក្រុមកំពូលតារាងខេត្តត្បូងឃ្មុំ ១ក្រុមប៉ុណ្ណោះ ដ្បិតខេត្តព្រះវិហារក៏បានដកខ្លួនដែរ។
ប៉ុន្តែលោក អ៊ួន ឧត្តម បានបញ្ជាក់ថា ទោះបីឆ្នាំនេះក្រុមរបស់លោករៀបចំមិនទាន់ បន្ទាប់ពីផ្អាកការប្រកួតជាយូរក៏ពិតមែន តែលោកបានប្ដេជ្ញានឹងរៀបចំក្រុមឲ្យបានល្អដើម្បីត្រៀមរដូវកាលថ្មី និងត្រៀមការប្រកួតប្រជែងក្នុងរបត់ថ្មីក្នុងបរិបទកូវីដ-១៩ ទាំងការរៀបចំកីឡាករ និងការរៀបចំទីលានជាដើម ដើម្បីចូលរួមប្រកួតពានរង្វាន់សម្ដេចតេជោ ហ៊ុន សែន ថ្នាក់ខេត្តនាឆ្នាំ២០២២ ខាងមុខ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
