មកដល់វេលានេះ គេសង្កេតឃើញមហាជនខ្មែរ គ្រប់ស្រទាប់វណ្ណៈទាំងអស់រួមទាំងមន្រ្តីគណបក្សប្រឆាំងមួយចំនួនផងមានសន្ទុះយ៉ាងភ្លូកទឹកភ្លូកដី តាមរយៈបណ្តាញសង្គមហ្វេសបុក និងប្រព័ន្ធផ្សព្វផ្សាយនានា បានប្រកាសគាំទ្រយ៉ាងពេញទំហឹងនូវគម្រោង«ព្រែកជីកហ្វូណនតេជោ»ដោយសារតែពួកគេមានមតិដូច គ្នាថា មានគម្រោងនេះនឹងធ្វើឲ្យសេដ្ឋកិច្ចកម្ពុជាកាន់តែរីកចម្រើនបន្ថែមទៀត និងលែងពឹងដង្ហើមគេដក ទៀតតាមរយៈនៃការដឹកជញ្ជូនទំនិញទៅខាងក្រៅនោះ។
សន្ទុះនៃការគាំទ្ររបស់មហាជនខ្មែរ ទាំងមន្រ្តីជាន់ខ្ពស់រាជរដ្ឋាភិបាល មន្រ្តីរាជការ កងកម្លាំង ប្រដាប់អាវុធ បណ្តាគណបក្សនយោបាយនានា សិល្បករ សិល្បការិនី រួមទាំងបងប្អូនប្រជាពលរដ្ឋខ្មែរទាំងក្នុង និងក្រៅប្រទេសបានសរសេរលើបណ្តាញសង្គមហ្វេសបុក ចេញជាវិដេអូឃ្លីប ចេញជាសេចក្តីថ្លែងការណ៍ និងចេញជាញាត្តិផងនោះ បានលើកឡើងថា ពួកគេពិតជាសប្បាយរីករាយយ៉ាងខ្លាំងចំពោះជំហរ របស់រាជរដ្ឋាភិបាលក្នុងការធ្វើព្រែកជីកហ្វូណនតេជោ នេះ ខណៈគម្រោងនេះ វានឹងនាំឲ្យកម្ពុជាកាត់បន្ថយ តម្លៃនៃការដឹកជញ្ជូនកាន់តែច្រើន រួមទាំងបង្កើនសេដ្ឋកិច្ចដល់ប្រជាជនកម្ពុជាកាន់តែល្អប្រសើរផងដែរ។
សន្ទុះនៃការគាំទ្ររបស់មហាជនខ្មែរយ៉ាងភ្លូកទឹកភ្លូកដីនេះ ក៏ជាការបង្ហាញនូវសាមគ្គីភាព និងរួម គ្នាដើម្បីអភិវឌ្ឍន៍ប្រទេស ដោយមិនចាំបាច់ពឹកផ្អែកដង្ហើមអ្នកដទៃទៀត ដូចអ្វីដែលសម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងជាប្រធានគណបក្សប្រជាជនកម្ពុជា បានមានប្រសាសន៍ នាយប់ថ្ងៃទី២៦ ខែ មេសា ឆ្នាំ២០២៤ ក្នុងឱកាសដែលសម្តេច បានអញ្ជើញសំណេះសំណាល ក្នុងសន្និបាតលើកទី១ និងកម្មវិធីពិសាអាហារសាមគ្គីមហាគ្រួសារសមាគមឧកញ៉ាកម្ពុជាផងដែរ។
សម្តេចតេជោ ហ៊ុន សែន អតីតនាយករដ្ឋមន្រ្តី និងជាបុរសខ្លាំងរបស់កម្ពុជា បានលើកឡើងថា កម្ពុជាគ្មានការរាថយនោះឡើយចំពោះគម្រោងធ្វើ«ព្រែកជីកហ្វូណនតេជោ» ហើយសម្តេចក៏បានប្រកាសផងដែរថា កម្ពុជា ក៏គ្មានអ្វីចាំបាច់ត្រូវចចារ និងពិគ្រោះយោបល់ជាមួយអ្នកណានោះដែរ ទាក់ទងនឹងគម្រោងនេះ។ ទាក់ទងនឹងគម្រោងដ៏ប្រវត្តិសាស្រ្តនេះសម្តេចតេជោ ក៏ហ៊ានយកជីវិតមកដាក់ផងដែរ ដើម្បីឲ្យគម្រោងនេះសម្រេចបានជោគជ័យ។
ជាមួយគ្នានោះដែរ សម្តេចតេជោ ហ៊ុន សែន ក៏បានអះអាងផងដែរថា បើកម្ពុជាមិនធ្វើព្រែកជីកហ្វូណនតេជោទេ គឺកម្ពុជានឹងរស់ដូចសុំដង្ហើមគេដកយ៉ាងដូច្នេះដែរ ហើយមួយវិញទៀតប្រសិន បើវៀតណាមគេមិនសូវសប្បាយចិត្ត នឹងកម្ពុជា រាល់ទំនិញកម្ពុជានឹងមិនអាចនាំចេញទៅក្រៅបាននោះឡើយ។ សម្តេចក៏បានប្រាប់ទៅវិទ្យាស្ថានសិក្សាស្រាវជ្រាវរដ្ឋវៀតណាមមួយ និងជនអគតិមួយក្តាប់តូចផងដែរថា កម្ពុជាមិនល្ងង់ដល់ថ្នាក់ឲ្យទឹកសាបហូរចូលសមុទ្រ ឬទឹកប្រៃចូលមកទឹកសាបនោះឡើយ ខណៈគម្រោងព្រែកជីកហ្វូណនតេជោនេះ នឹងបង្កើនសេដ្ឋកិច្ចដល់កម្ពុជាឲ្យកាន់តែរីកចម្រើន ហើយជាងនេះទៅទៀតនោះ គម្រោងនេះនឹងកាតបន្ថយការបង់ពន្ធទៅឲ្យវៀតណាម តាមរយៈការដឹកជញ្ជូនកាន់តែច្រើនផងដែរនោះ ដូច្នេះគម្រោងព្រែកជីកហ្វូណនតេជោនេះ ត្រូវតែធ្វើជាដាច់ខាត់ដោយគ្មានការរាថយនោះឡើយ៕អត្ថបទ៖ បាន ចក់