យោងតាមប្រព័ន្ធផ្សព្វផ្សាយរដ្ឋរបស់ចិន មនុស្សយ៉ាងហោចណាស់ ៥ នាក់បានស្លាប់ និង​៣៣​នាក់​បានរងរបួសនៅក្នុងព្យុះកួចដ៏កំណាចមួយកាលពីថ្ងៃសៅរ៍ដែលបានវាយប្រហារទីក្រុង ក្វាង​ចូវ (Guangzhou) ជាទីក្រុងដែលមានប្រជាជនចំនួន១៩ លាននាក់​នៅ​ភាគ​ខាង​ត្បូង​ប្រទេស​ចិន។

យោងតាមទីភ្នាក់ងារសារព័ត៌មានរដ្ឋ ស៊ិនហួ (Xinhua) ក្រុមអាជ្ញាធរបាននិយាយថា អគារ​រោង​ចក្រ​ចំនួន ១៤១កន្លែង ត្រូវបានខូចខាត ប៉ុន្តែពុំមានលំនៅឋានណាមួយដួលរលំនោះទេ។ ប្រភព​ខាងលើនេះបាននិយាយថាការវាយតម្លៃបឋមបានដាក់ប្រភេទខ្យល់កួចនេះនៅកម្រិតទី៣ ពោល​គឺទាបជាង២កម្រិត ដែលកម្រិតខ្ពស់បំផុតគឺទី៥។ 

ទីក្រុង ក្វាងចូវ របស់ខេត្ត ក្វាងទុង(Guangdong) មានចម្ងាយ​ប្រហែល​១៣០​គីឡូម៉ែត្រ​ពី​ទី​ក្រុង​ហុងកុង​។

សារព័ត៌មាន​ស៊ីនហួបានរាយការណ៍ថា ស្ថានីយ៍អាកាសធាតុមួយនៅក្នុងភូមិ លៀងធាន​(Liangtian) ស្រុក ប៉ៃយ៉ុន (Baiyun) ចម្ងាយប្រហែល ១,៧ម៉ាយល៍ពីទីតាំងខ្យល់ព្យុះ បាន​កត់​ត្រា​កម្លាំងខ្យល់បក់អតិបរមា ២០,៦ ម៉ែត្រក្នុងមួយវិនាទី។

គិតត្រឹម​ម៉ោង ១០ យប់ ម៉ោងក្នុងស្រុក ប្រតិបត្តិការស្វែងរក និងជួយសង្គ្រោះត្រូវបានបញ្ចប់។

ព្យុះនេះ​ កើតឡើងបន្ទាប់ពីមានភ្លៀងធ្លាក់ខ្លាំងជាច្រើនថ្ងៃ ដែលបាន​បោក​បក់​នៅ​ភាគ​ខាង​ត្បូង​ប្រទេស​ចិន បង្កជាទឹកជំនន់ដ៏ធ្ងន់ធ្ងរ និងគំរាមកំហែងដល់អាយុជីវិតមនុស្សរាប់សិបលាននាក់ ខណៈ​ក្រុមអ្នកជួយសង្គ្រោះប្រញាប់ប្រញាល់ជម្លៀសអ្នកស្រុកដែលជាប់ក្នុងទឹកជំនន់។

 កាលពី​ដើមសប្តាហ៍នេះ ប្រព័ន្ធផ្សព្វផ្សាយរដ្ឋបានរាយការណ៍ថា ទឹកជំនន់បាន​ឆក់​យក​ជីវិត​មនុស្ស​យ៉ាង​ហោចណាស់ ៤ នាក់នៅខេត្ត ក្វាងទុង៕