រដ្ឋមន្ត្រីក្រសួងការបរទេសកម្ពុជា មានប្រសាសន៍ជំរុញឲ្យបណ្តាថ្នាក់ដឹកនាំ មន្ត្រីទូត និង​ពលរដ្ឋ​ខ្មែរ នៅតាមបណ្តាប្រទេសនានា រួមគ្នាបង្កើនផ្សព្វផ្សាយប្រពៃណី វប្បធម៌ល្អរបស់ខ្មែរ ផលិតផល ម្ហូបអាហារ គោលដៅទេសចរណ៍កម្ពុជា ដើម្បីបង្កើនផ្សព្វផ្សាយកិត្តិនាមកម្ពុជា ជំរុញទេសចរ និង​អ្នកវិនិយោគទុនបណ្តាប្រទេសនានានោះ ទិញផលិតផលកម្ពុជា មកទស្សនាកម្សាន្តកម្ពុជា និង​មក​បណ្តាក់ទុនវិនិយោគនៅកម្ពុជាជាដើម។

នៅក្នុងពិធីបើកពិព័រណ៌ផ្សារ Bazaar ផ្សព្វផ្សាយផលិតផល និងសេវាកម្ម ម្ហូបអាហារ​បណ្តា​ប្រទេស​អាស៊ាន និងប្រទេសដៃគូអាស៊ាន នៅស្ថានទូតឥណ្ឌូនេស៊ី ប្រចាំនៅកម្ពុជា ថ្ងៃទី២៧ ខែ​មេសា​នេះ ឯកឧត្តម ឧបនាយករដ្ឋមន្ត្រី សុខ ចិន្តាសោភា រដ្ឋមន្ត្រីក្រសួងការបរទេស និងកិច្ច​សហប្រតិបត្តិការអន្តរជាតិ ថ្លែងថា នៅក្នុងឱកាសបុណ្យចូលឆ្នាំថ្មីប្រពៃណីខ្មែរ ឆ្នាំរោង ឆ្នាំ​២០២៤ កន្លងទៅថ្មី បណ្តាស្ថានទូតខ្មែរ និងពលរដ្ឋខ្មែរ នៅតាមបណ្តាប្រទេសនានា គឺបាន​រៀប​ចំ​សង្ក្រាន្ត​អបអរសាទរបុណ្យចូលឆ្នាំ ដែលមានបង្ហាញអត្តសញ្ញាណ ទំនៀមទំលាប់ ប្រពៃណី វប្បធម៌​ខ្មែរ​ជាច្រើន ហើយឯកឧត្តម ស្នើឲ្យបណ្តាស្ថានទូត និងពលរដ្ឋខ្មែរនៅក្រៅប្រទេស បង្កើន​ការ​រួម​សហការគ្នាបន្ថែមទៀត ផ្សព្វផ្សាយ សម្បត្តិវប្បធម៌ខ្មែរ ផលិតផល សេវាកម្ម ទេសចរណ៍ និង​ម្ហូបអាហារខ្មែរជាដើ ដើម្បីបង្កើនកិត្តិនាមកម្ពុជា និងការប្រើប្រាស់ផលិតផលកម្ពុជា លើ​ឆាក​អន្តរជាតិ។

ឯកឧត្តម ឧបនាយករដ្ឋមន្ត្រី សុខ ចិន្តាសោភា បន្តថា កន្លងមក ស្ថានទូត​កម្ពុជា​ប្រចាំ​នៅ​តាម​បណ្តា​ប្រទេស គឺបានខំប្រឹងធ្វើសកម្មភាពខ្លាំង លើការងារផែ្នកសិល្បៈវប្បធម៌ និងម្ហូបអាហារខ្មែរ ដើម្បី​ផ្សព្វផ្សាយជាតិ ហើយតាមរយៈការរៀបចំព្រឹត្តិការណ៍កីឡាSEA GAME និងPARA GAME នៅ​កម្ពុជា ក្នុងឆ្នាំ២០២៣កន្លងមក និងការរៀបចំព្រឹត្តិការណ៍ប្រកួតកីឡាវាយកូនបាល់អន្តរជាតិ នៅ​ពហុកីឡាដា្ឋនមរតកតេជោ នៅក្នុងអំឡុងខែកក្តដា ឆ្នាំ២០២៤នេះទៀត នឹង​ជំរុញ​បង្កើន​ការ​ផ្សព្វផ្សាយ​កិត្តិនាមកម្ពុជា និងជំរុញបណ្តាប្រទេសលើពិភពលោក ស្គាល់ពីកម្ពុជា កាន់តែ​ច្រើន​ថែម​ទៀត​៕ អត្ថបទ ស៊ុម សុខជា