អ្នកឃើញហេតុការណ៍ និងក្រុមមន្ត្រីសហជីព បាននិយាយថា នគរបាលនៅប្រទេសបេណាំង (Benin) បានបាញ់ឧស្ម័នបង្ហៀរទឹកភ្នែក ដើម្បី​បំបែក​ការ​តវ៉ា​ជុំវិញ​អ្វី​ដែល​ក្រុម​សហជីព​ហៅ​ថា​ជាកា​រប្រ​ឆាំងទៅនឹងប្រាក់ខែទាប និងការហក់ឡើងតម្លៃទំនិញខ្ពស់ពេកនៅតាមទីផ្សារ ហើយ​ពួក​គេ​បាន​ចាប់​ខ្លួនឥស្សរជនជាន់ខ្ពស់របស់សហជីពនេះជាច្រើននាក់កាលពីចុងសប្ដាហ៍នេះ ។  

នគរបាលប្រដាប់អាវុធបានបិទផ្លូវចូលទៅក្រុមប្រឹក្សាការងារក្នុងរដ្ឋធានីពាណិជ្ជកម្មកូតូនូ(Cotonou) ជុំវិញតំបន់ ដែលអាចមានបាតុកម្មផ្ទុះឡើង និងដេញក្រុមអ្នកសារព័ត៌មានចេញ។ យ៉ាង​ណា​ក៏​ដោយ ក្រុមបាតុករមួយចំនួនបានប្រមូលផ្តុំគ្នានៅក្បែរនោះ ដោយកាន់ស្លាកសញ្ញា និង​ពាក់​អាវ​យឺត​សហជីព មុនពេលកងកម្លាំងនគរបាលបំបែកពួកគេ។

លោក ម៉ូដាស៊ីរ៉ូ បាចាប៊ី (Moudassirou Bachabi) ប្រធានសហព័ន្ធកម្មករ បេណាំង (Benin) (CGTB) និង លោក អានសេលម៉ី អាម៉ូសូ (Anselme Amoussou) ប្រធានសហជីព CSA-Benin ត្រូវបានចាប់ខ្លួនជាមួយនឹងបាតុករ ១៦ នាក់ផ្សេងទៀត នេះបើ​យោង​តាម​អគ្គ​លេខា​ធិការ​រង​សហព័ន្ធ​កម្មករ CGTB លោក អានីតា បូសូកប៉េ (Anita Bossoukpe)។ យ៉ាងណា គេមិន​អាច​ទាក់​ទងសុំការបំភ្លឺពីកងកម្លាំងនគរបាលបានទេ។

ប្រាក់បៀវត្សរ៍​អប្បបរមាដែលត្រូវបានធានានៅក្នុងប្រទេស បេណាំង គឺ៥២.០០០ហ្វ្រង់ (52,000 CFA) ឬស្មើ៨៥ ដុល្លារក្នុងមួយខែ កើនឡើងពី ៤០.០០០ ហ្វ្រង់ ស្មើ ៦៥ ដុល្លារ ក្នុង​ខែមករា ឆ្នាំ ២០២៣។ ប៉ុន្តែតម្លៃប្រេងឥន្ធនៈ និងផលិតផលម្ហូបអាហារ រួមទាំងពោត ម្សៅហ្គារី សណ្តែក និងសណ្តែកសម្រាប់សត្វគោ បានកើនឡើងនៅក្នុងរយៈពេលប៉ុន្មានខែថ្មីៗនេះ។  

មូលនិធិរូបិយវត្ថុអន្តរជាតិបាននិយាយនៅខែនេះថា ប្រាក់ចំណូល​នៅ​អនុតំបន់​សាហារ៉ា​អាហ្រ្វិក​កំពុង​ធ្លាក់​ចុះបន្ថែមទៀតនៅពីក្រោយប្រទេសដទៃទៀតរបស់ពិភពលោក ស្រប​ពេល​មា​ន​ការ​ងើប​ឡើង​វិញ​តិចតួចនៃសេដ្ឋកិច្ចសកល៕