មនុស្សរាប់ពាន់នាក់បានប្រមូលផ្តុំគ្នាសម្រាប់ថ្ងៃទី២ នៅទូទាំង​ទីក្រុង​ជា​ច្រើន​របស់​ប្រទេស​អូស្ត្រាលី​កាល​ពីថ្ងៃអាទិត្យ ទី២៨ មេសា ដោយជំរុញឱ្យពង្រឹង​ច្បាប់​កាន់​តែ​តឹងរ៉ឹង​លើ​អំពើ​ហិង្សា​យេនឌ័រ​ ខណៈលោកនាយករដ្ឋមន្រ្តី Anthony Albanese ប្រកាសថាទង្វើនេះគឺជា វិបត្តិជាតិ នៅ​ឯការជួបជុំមួយក្នុងទីក្រុងកង់បេរ៉ា (Canberra)។

ការប្រមូល​ផ្តុំ​នេះត្រូវបានរុញដោយរលកនៃអំពើហិង្សាលើស្ត្រី​ដែលរដ្ឋាភិបាល​និយាយ​ថាបាន​ឃើញ​ស្ត្រី​ម្នាក់​ត្រូវបានសម្លាប់រៀងរាល់បួនថ្ងៃម្តងនៅក្នុងប្រទេសអូស្ត្រាលីក្នុងឆ្នាំនេះ។ ការ​ប្រមូល​ផ្តុំ​គ្នា​ក៏បានធ្វើឡើងផងដែរ បន្ទាប់ពីមានការបាញ់ប្រហារដ៏ធំនៅទីក្រុងស៊ីដនីក្នុងខែនេះ ដែល​បាន​សម្លាប់​មនុស្សចំនួន ៦ នាក់ក្នុងនោះមានស្ត្រី ៥ នាក់ ។

នៅទីក្រុងមេលប៊ន(Melbourne) មនុស្សរាប់ពាន់នាក់បានចេញតវ៉ាតាមដងផ្លូវនានានា និង​ទីលាន​សហព័ន្ធកាលពីថ្ងៃអាទិត្យ ដោយស្រែក និងកាន់ស្លាកសញ្ញា និងបដា។

 លោក Albanese បាននិយាយនៅឯការប្រមូលផ្តុំគ្នានៅទីក្រុងកង់បេរ៉ាថា នេះ​មិន​មែន​គ្រាន់​តែ​ជា​បញ្ហា​របស់រដ្ឋាភិបាលប៉ុណ្ណោះទេ តែក៏ជាបញ្ហានៃសង្គមរបស់យើងទាំងមូលផងដែរ។ 

អំពើ​ហិង្សាទាក់ទងយេនឌ័រ គឺជាបញ្ហានៅតែបន្តកើតឡើងក្នុងប្រទេសអូស្ត្រាលី ដែល​មាន​ប្រជាជន​ជាង​ ២៦លាននាក់។កាលពីឆ្នាំ២០២១កន្លងទៅ មនុស្សរាប់ម៉ឺន​នាក់​បាន​ប្រមូល​ផ្តុំ​គ្នា​ជុំវិញ​ការ​ចោទប្រកាន់ពីបទរំលោភបំពានផ្លូវភេទ និងការប្រព្រឹត្ត​ខុស​នៅ​ក្នុង​ការិយាល័យ​នយោបា​យ​ខ្ពស់​បំផុតមួយចំនួនរបស់ប្រទេសនេះ៕