ការតវ៉ាគាំទ្រពលរដ្ឋប៉ាឡេស្ទីននៅក្នុងដែនដីហ្កាហ្សា ដែលបានរីករាលដាលនៅ​តាម​បរិវេណ​សាកលវិទ្យាល័យ​នានាទូទាំងសហរដ្ឋអាមេរិក បានចូលទៅដល់ចក្រភពអង់គ្លេស និងបារាំង ដោយបង្ហាញពីសាមគ្គីភាពជាមួយប្រជាជនប៉ាឡេស្ទីន និងទាមទារឱ្យមាន​ចំណាត់ការ​ជុំវិញ​ការ​ទម្លាក់​គ្រាប់​បែករបស់អ៊ីស្រាអែលទៅលើតំបន់ហ្កាហ្សា។

និស្សិតរាប់សិបនាក់បានប្រមូលផ្តុំគ្នានៅសាកលវិទ្យាល័យ University College London (UCL) កាលពីចុងសប្ដាហ៍នេះអមដោយបដាសរសេរថា ភាពស្មុគ​ស្មាញ​ក្នុង​អំពើ​ប្រល័យ​ពូជ​សាសន៍ និងទាមទារឱ្យបញ្ឈប់សកម្មភាពកាប់សម្លាប់ជនស្លូតត្រង់ក្នុងដែនដីនេះ។

ខណៈ​ស្រែក​ថា គ្មានលុយជួយអ៊ីស្រាអែលប្រព្រឹត្តឧក្រិដ្ឋកម្មទៀតទេ ក្រុមនិស្សិតទីក្រុងឡុងដ៍្រ ដែលកំពុងកាន់ទង់ជាតិប៉ាឡេស្ទីន និយាយាថា នេះជា​ពេល​វេលា​របស់​យើង​ជួយ​ពលរដ្ឋ​ប៉ាឡេស្ទីន បន្ទាប់ពីការ​តវ៉ា​ដ៏​រំជើប​រំជួល​ទាំង​នេះបា​ន​រាល​ដាល​ចេញ​ពី​សាកលវិទ្យាល័យ​ទូទាំង​សហរដ្ឋ​អាមេរិក​ហៀរដល់ប្រទេសបារាំង។ និស្សិតវ័យ១៩ឆ្នាំម្នាក់មកពីសាកលវិទ្យាល័យ UCL​នៅ​អង់គ្លេស បានប្រាប់សារព័ត៌មានThe National ថា មានការគាំទ្រកាន់តែច្រើន ដូច្នេះ​យើង​ពិត​ជា​រំភើប​ចំពោះរបៀបដែលចលនានេះរីកចម្រើន។

ក្រុមនិស្សិតទាំងនោះ បានទាមទារឱ្យឲ្យមានការថ្កោលទោសចំពោះសកម្មភាពរបស់អ៊ីស្រាអែល នៅ​ក្នុង​ការ​តវ៉ាមួ​យ​ដែល​បាន​ជំរុ​ញ​ឱ្យ​មាន​បាតុកម្ម​ស្រដៀង​គ្នា​នៅ​តាម​សាកលវិទ្យាល័យ​នានា​ទូទាំង​ សហរដ្ឋអាមេរិក។

និស្សិតម្នាក់មកពីសាកលវិទ្យាល័យ Sciences Po ក្នុងប្រទេសបារាំង បានប្រាប់ទីភ្នាក់​ងារ​ព័ត៌មាន Reutersថា នៅពេលយើងឃើញអ្វីដែលកំពុងកើតឡើងនៅក្នុងសហរដ្ឋអាមេរិក ហើយ​ឥឡូវ​នេះនៅក្នុងប្រទេសអូស្ត្រាលី យើងពិតជាសង្ឃឹមថាការតវ៉ានឹងផ្ទុះឡើងកាន់តែខ្លាំង នៅក្នុងប្រទេសបារាំង ៕