ភ្នំពេញ៖ សមាគមយុវជនខ្មែរមហានគរ នៃបណ្ដុំអង្គការសមាគមសង្គមស៊ីវិល សហការ​ជាមួយ​រដ្ឋបាល​ខណ្ឌ​ព្រែកព្នៅ និងដោយមានការគាំទ្រពីក្រសួងបរិស្ថាន នៅព្រឹកថ្ងៃទី២៨ ខែមេសា ឆ្នាំ​២០២៤​នេះ បានរៀបចំកម្មវិធី៖ ការចែករំលែកក្តីស្រឡាញ់ និងស្នាមញញឹម លើកទី១៣ ក្រោម​ប្រធានបទ «ការអប់រំ និងបរិស្ថាន» នៅ សាលាបឋមសិក្សាបឹងប្រីយ៍ ស្ថិតក្នុងភូមិតាគល់ សង្កាត់​ពន្សោង ខណ្ឌព្រែកព្នៅ រាជធានីភ្នំពេញ។ 

កម្មវិធីនេះធ្វើឡើងក្រោមអធិបតីភាពឯកឧត្តម ខ្វៃ អាទិត្យា អនុរដ្ឋលេខាធិការ និងជា​អ្នក​នាំ​ពាក្យ​ក្រសួង​បរិស្ថាន, លោក ហេង សំណាង ប្រធានក្រុមយុវជនសង្គមស៊ីវិល រួមនឹងអាជ្ញាធរខេត្ត លោក ឆើម សេរីវឌ្ឍន៍ អភិបាលរងខណ្ឌ តំណាងលោក ធឹម សំអាន អភិបាល នៃ​គណៈ​អភិបាល​ខណ្ឌ​ព្រែកព្នៅ លោកគ្រូអ្នកគ្រូ សិស្សានុសិស្សសរុបប្រមាណ ៣៥០នាក់។

ក្នុងឱកាសនោះ ឯកឧត្តម ខ្វៃ អាទិត្យា អនុរដ្ឋលេខាធិការ និងជាអ្នកនាំ​ពាក្យ​ក្រសួង​បរិស្ថាន​បាន​លើក​ឡើង​ថា ក្រសួងបរិស្ថាន នៅក្នុងអាណត្តិរាជរដ្ឋាភិបាលនីតិកាលទី៧នេះ បានកំណត់​ទិស​ដៅ​ការងារ​ជាអាទិភាព គឺការលើកកម្ពស់ការយល់ដឹង និងការចូលរួមរបស់ប្រជាពលរដ្ឋ សំដៅ​ផ្លាស់​ប្តូរ​ឥរិយាបទ និងទម្លាប់ការរស់នៅ ក្នុងភាពស្អាត បរិស្ថានបៃតង និងអព្យាក្រឹត្យកាបូន។

ជា​មួយ​គ្នានេះ ឯកឧត្តម បានវាយតម្លៃខ្ពស់ចំពោះការចូលរួម អាជ្ញាធរមូលដ្ឋានគ្រប់លំដាប់ថ្នាក់ និង​អង្គកាដៃគូ ក្នុងការចែករំលែកការស្រឡាញ់ និងការអប់រំបរិស្ថាន រួមជាមួយ​ពិធី​ដាំកូន​ឈើ​នៅ​តាម​សាលា​រៀន ជាពិសេសជាមួយសិស្សានុសិស្ស ដើម្បីបង្កើតសកម្មភាពមេត្រីបរិស្ថាន ជា​ពិសេស​បាន​ចូលរួមអនុវត្តយុទ្ធសាស្ត្រចក្រាវិស័យបរិស្ថាន ដែលបាន​បង្កើត​ឡើង​ដោយ​មាន​ការ​ណែនាំ​ដ៏​ខ្ពង់ខ្ពស់ និងគាំទ្រយ៉ាងពេញទំហឹង ពីសម្តេចមហាបវរធិបតី ហ៊ុន ម៉ាណែត នាយករដ្ឋ​មន្រ្តី​នៃព្រះរាជាណាចក្រកម្ពុជា នាពេលថ្មីៗនេះ ដែលផ្តោតសំខាន់​លើ​មុំយុទ្ធសាស្រ្ត​បី​សំខាន់​ភាព​ស្អាត​ ភាពបៃតង និងចីរភាព។

នៅក្នុងឱកាសនោះ ឯកឧត្តម បានលើកឡើង​ពី​យុទ្ធនាការ​កាត់បន្ថយ​ការ​ប្រើប្រាស់​ប្លាស្ទិក​នៅ​កម្ពុជា ក្រោមប្រធានបទ «ថ្ងៃនេះខ្ញុំមិនប្រ់ថង់ប្លាស្ទិកទេ» ពិតជាមានសារៈសំខាន់ និង​បាន​បំផុស​នៅ​ចលនា​ចូលរួមរបស់ក្មេងៗ ជំនាន់ក្រោយនៅតាមសាលរៀនទូទាំងប្រទេស ប្រមាណ​ជាង​៣​លាន​៤​សែន​នាក់ ឱ្យមានការយល់ដឹង និងអនុវត្ត ដើម្បីធ្វើឱ្យតាមសាលារៀន ដងផ្លូវ ទី​សាធារណៈ តំបន់សហគមន៍ កន្លែងទេសចរណ៍ ជាកន្លែងដែលស្អាត និងគ្មាន​ការ​ប្រើ​ប្រាស់​ថង់​ប្លាស្ទិក និងមានភាពបៃតង មានដើមឈើ មានម្លប់ និងមានខ្យល់អាកាសល្អ ហើយ​បាន​ចូលរួម​ជាមួយ​រាជ​រដ្ឋាភិបាល ក្នុងការសម្រេចគោលដៅប្រទេសកម្ពុជា ជាប្រទេសអព្យាក្រឹតកាបូន និង​មានគម្របព្រៃ៦០% នៅឆ្នាំ២០៥០៕