​ហៃ​ទី៖ នាយករដ្ឋមន្ត្រី​បណ្ដោះ​អាសន្ន​ ដែល​ទើប​ស្បថ​ចូលកាន់​តំណែង​ថ្មី​របស់​ហៃ​ទី​បាន​និយាយ​ថា ​រដ្ឋាភិបាល​របស់​លោក​មាន​គម្រោង​ធ្វើការ ​ដើម្បី​អនុញ្ញាត​ឱ្យ​ប្រទេស​ក្នុង​តំបន់​កា​រ៉ា​អ៊ី​ប​មួយ​នេះ រៀបចំ​ការបោះឆ្នោត​ឱ្យ​បាន​ឆាប់​តាម​ដែល​អាច​ធ្វើ​ទៅ​បាន បន្ទាប់ពី​ការ​ធ្វើ​ឃាត​ប្រធានាធិបតី Jovenel Moise ដែល​បាន​ធ្វើ​ឱ្យ​ប្រទេស​នេះ​ស្ថិត​ក្នុង​ភាព​មិន​ច្បាស់​លាស់ ​ផ្នែក​នយោ​បាយ​កាន់តែ​ធ្ងន់ធ្ងរ​។​

​កាលពី​ថ្ងៃ​ពុធ​នោះ​ដែរ សមាជិក​ក្រុម​ប្រឆាំង​ជាច្រើន​នាក់​ដែល​កំពុង​ប្រឆាំង​នឹង​អន្តរាគមន៍​ និង​ការ​ជ្រៀត​ជ្រែក​ពី​បរទេស​ចូល​ក្នុង​នយោ​បាយ​ហៃ​ទី​ បាន​ហែ​ក្បួន​តវ៉ា​ទៅកាន់​ស្ថានទូត​អាមេរិក​នៅ​ទីក្រុង​រដ្ឋធានី​ព័រ​អូ​ប្រាំង ដោយ​បាន​ដុត​កង់​រថយន្ត​ផង​ដែរ​។​ លោក Ariel Henry ដែល​ត្រូវ​បាន​បញ្ជាក់​ជា​នាយករដ្ឋមន្ត្រី​ក្នុង​ពិធី​មួយ​ នៅ​ទីក្រុង​រដ្ឋធានី​ព័រ​អូ​ប្រាំង (Port-au-Prince) កាលពី​សប្ដាហ៍​មុន​បាន​និយាយ​កាលពី​ថ្ងៃ​ពុធ​ថា បេសកកម្ម​របស់​រដ្ឋា​ភិ​បាល​នេះ​គឺ​រៀបចំ​លក្ខខណ្ឌ​ ដើម្បី​រៀបចំ​ការ​បោះ​ឆ្នោត​ឱ្យ​បាន​ឆាប់​បំផុត​តាម​ដែល​អាច​ធ្វើ​ទៅ​បាន​។ លោក Henry មិនបាន​និយាយ​ថា ​នៅ​ពេល​ណា​ឲ្យ​ប្រាកដ​នោះ​ទេ ចំពោះ​ការបោះឆ្នោត​ដែល​លោក Moise ធ្លាប់​បាន​សន្យា​ថា​នឹង​រៀបចំ​នៅ​ចុង​ឆ្នាំ​នេះ​ទេ​។​

​ការ​អត្ថាធិប្បាយ​របស់​លោក​ធ្វើឡើង ​ស្រប​ពេល​ដែល​ប្រទេស​ហៃ​ទី​បន្ត​រំជើបរំជួល ​ដោយសារ​អស្ថិរភាព​នយោបាយ​ដែល​កាន់តែ​អាក្រក់​ទៅៗ ព្រោះតែ​ការ​ស្លាប់​របស់​លោក​ប្រធានាធិបតី Moise កាលពី​ព្រឹក​ព្រលឹម​ថ្ងៃ​ទី​៧ ខែ​កក្កដា នៅ​ពេល​ដែល​ក្រុម​ខ្មាន់កាំភ្លើង​ប្រដាប់​អាវុធ​ បាន​សម្រុកចូល​គេហដ្ឋាន​ឯកជន​របស់​លោក​នៅ​ក្នុង​រដ្ឋធានី និង​បាញ់​ស្រោច​លើ​រូបលោក និង​ភរិយា​បណ្ដាល​ឲ្យ​រង​របួស​ធ្ងន់​។​ សហរដ្ឋ​អាមេរិក​ និង​អង្គការសហប្រជាជាតិ​បាន​ទទូច​ដល់​ក្រុម​មេដឹកនាំ​ហៃ​ទី​ដើរ​ទៅមុខ​ ជាមួយ​នឹង​ការបោះឆ្នោត​ជា​មធ្យោបាយ​មួយ​ ដើម្បី​ចេញពី​វិបត្តិ​ដែល​កំពុង​កប់​ជ្រៅ ប៉ុន្តែ​បណ្ដា​មេដឹកនាំ​សង្គម​ស៊ីវិល​បាន​ចោទ​ជា​សំណួរ​ថា​ តើ​ស្ថានភាព​បច្ចុប្បន្ន​នៅ​ក្នុង​ប្រទេស​ហៃ​ទី​ អំណោយ​ផលដល់​ការបោះឆ្នោត​ប្រកបដោយ​សេរី ​និង​យុត្តិធម៌​ដែរ ​ឬទេ​៕

អត្ថបទ៖ សុខមាន