ខួបអនុស្សាវរីយ៍លើកទី១៣៨ នៃទិវាពលកម្មអន្តរជាតិ ១ឧសភា ឆ្នាំ២០២៤នេះ រាជរដ្ឋាភិបាល​កម្ពុជា បានប្រារព្ធធ្វើឡើងក្រោមប្រធានបទ «សហគ្រាសមួយ ជាសហគមន៍សុខសាន្តមួយ» ក្នុង​គោល​បំណងសំដៅធ្វើឲ្យមានភាពកាន់តែល្អប្រសើរឡើង​នៃ​ទំនាក់​ទំនង​វិជ្ជាជីវៈ​នៅ​កន្លែង​ការងារ​។

លោក គឹម ចាន់សំណាង ប្រធានសហភាពសិទ្ធិកម្មករកម្ពុជា ក្នុងបទសម្ភាសន៍ជាមួយព័ត៌មាន ប៊ីធីវី នៅព្រឹកថ្ងៃទី២៩ ខែមេសានេះ បានសម្តែងការគាំទ្រចំពោះប្រធានបទ «សហគ្រាសមួយ ជា​សហគមន៍​សុខសាន្តមួយ» ក្នុងឱកាសអបអរសាទរទិវាពលកម្មអន្តរជាតិ ១ឧសភា ព្រោះជា​ការ​បង្ហាញ​ពី​ការ​យកចិត្តទុកដាក់កាន់តែច្រើនឡើងរបស់ប្រមុខរាជរដ្ឋាភិបាលកម្ពុជា ចំពោះរោង​ចក្រ​ដែល​មាន​ការអនុវត្តទៅលើផ្លូវច្បាប់ ក៏ដូចជាការដោះស្រាយវិវាទដោយរលូន ជាពិសេសរាល់អ្វីៗ​ទាំង​អស់​ គឺត្រូវសហការ រវាងនិយោជក សហជីព ក៏ដូចជាក្រុមការងារ​ក្នុង​រោងចក្រ​ផលិតកម្ម​ដែល​បង្ក​លក្ខណៈងាយស្រួលឲ្យកម្មករកម្មការិនីមានសកម្មភាពដោយរលូន ហើយឈាន​ទៅ​ដល់​ការ​កើន​ឡើង​នូវផលិតភាព ដើម្បីឲ្យមានការនាំចេញ។

លោកបានបន្តថានេះគឺជាគោលការណ៍មួយរបស់ក្រសួងការងារ និងបណ្តុះបណ្តាលវិជ្ជាជីវៈ ក៏​ដូច​ជា​រាជរដ្ឋាភិបាល ដែលបានដាក់ចេញដើម្បីឲ្យគ្រប់រោងចក្រទាំងអស់ទទួល និងការអនុវត្ត ហើយ​ជា​ពិសេស​បន្តទៅមុខទៀតនេះ រដ្ឋាភិបាលបានតម្រូវឲ្យរោងចក្រទាំងអស់ ត្រូវចូលរួម​អនុវត្ត​ចំពោះ​កម្មករកម្មការិនី ដែលជាសមាជិក សមាជិកា ក៏ត្រូវទទួលបានបណ្ណ ប.ស.ស. ដោយ​ពុំ​មាន​ការ​គិត​ប្រាក់​អ្វីទាំងអស់។

ក្រុមកម្មការិនី កំពុងបម្រើការងារក្នុងរោងចក្រកាត់ដេរសម្លៀកំពាក់ ជាវៃ ស្ថិតនៅតំបន់វេងស្រេង រាជ​ធានី​ភ្នំពេញ បាននិយាយជាមួយទឹកមុខសប្បាយរីករាយថា ការងារសព្វថ្ងៃនេះ ប្រសិនបើ មិន​មាន​ការ​ជួយ​ជ្រោមជ្រែងរបស់រដ្ឋាភិបាលនោះទេ ក៏ពួកគាត់គ្មានប្រាក់​ចំណូល​ដើម្បី​ផ្គត់ផ្គង់​គ្រួសារ​ផង​ដែរ​។ កម្មការនីទាំងនេះ បានឲ្យដឹងស្រដៀងគ្នាទៀតថា អ្វីដែលជាការកត់សម្គាល់ ក្រៅពីការ​តម្លើង​ប្រាក់​ឈ្នួលអប្បបរមាជារៀងរាល់ឆ្នាំ រដ្ឋាភិបាលតែងតែ​គិតគូរ​ជា​និច្ច​ក្នុង​ការ​ទាក់ទាញ​អ្នក​វិនិយោគ​ពី​បណ្តាប្រ​ទេសផ្សេងៗឲ្យមកវិនិយោគនៅកម្ពុជា ដើម្បីធានាបាននូវច្រវ៉ាក់ផលិតកម្ម ផ្តល់​មុខរបរ និងការងារប្រាក់ចំណូលជូនដល់កម្មករនិយោជិតគ្រប់វិស័យទាំងអស់។

គួរបញ្ជាក់ថា ក្នុងឱកាសប្រារព្ធខួបអនុស្សាវរីយ៍លើកទី១៣៨ នៃទិវាពលកម្មអន្តរជាតិ ១​ឧសភា​នេះ​ ក្រសួងការងារ និងបណ្តុះបណ្តាលវិជ្ជាជីវៈ បានប្រកាសរៀបចំយុទ្ធនាការប្រឡងប្រណាំង “សហគ្រាសមួយ ជាសហគមន៍សុខសាន្តមួយ” នៅទូទាំងប្រទេសចាប់ពីឆ្នាំ២០២៤នេះតទៅ ដើម្បី​ចូលរួមលើកកម្ពស់សុខដុមនីយកម្មក្នុងទំនាក់ទំនងវិជ្ជាជីវៈនៅតាមរោងចក្រ សហគ្រាស។ ក្រសួងបានបញ្ជាក់ទៀតថា ការប្រឡងប្រណាំង ដើម្បីទទួលបានពានរង្វាន់នេះដែរ ត្រូវអនុវត្ត​ជា​រៀង​រាល់​ឆ្នាំ ចំពោះសហគ្រាសផ្នែកវាយនភណ្ឌកាត់ដេរ ផលិតស្បែកជើង និងផលិតផល​ធ្វើ​ដំណើរ និងកាបូប និងសហគ្រាសផ្នែកផ្សេងទៀត ដែលស្ម័គ្រចិត្តចូលរួមប៉ុណ្ណោះ៕ អត្ថបទ៖  ឈិត បូរ៉ាវី