ព្រែកជីកហ្វូណនតេជោ បានក្លាយជាប្រធានបទសំខាន់សម្រាប់សង្គមកម្ពុជា ក្នុង​រយៈ​ពេល​ប៉ុន្មាន​ថ្ងៃ​មក​នេះ។ សម្រាប់យុវជន បង្ហាញជាការគាំទ្រទាំងស្រង់ ចំពោះការ​កសាង​ព្រែក​ជីកហ្វូណន​តេជោ ​ដែលជាគំនិតផ្ដួចផ្ដើមរបស់សម្ដេចតេជោ ហ៊ុន សែន អតីតនាយករដ្ឋមន្ត្រី។ ពួកគេ​ក៏​ចង់​ឃើញ​សមិទ្ធផល​ព្រែកជីកហ្វូនណនតេជោ លេចឡើងជារូបរាងឆាប់ៗ​ដើម្បី​បម្រើ​ដល់​សេដ្ឋកិច្ច​ជាតិ​កម្ពុជា​។

ព្រែកជីកហ្វូណនតេជោជាគម្រោងសាងសង់ផ្លូវទឹកដ៏ធំជាប្រវត្តិសាស្ត្រសម្រាប់កម្ពុជា។ គម្រោង​នេះ​ជា​គំនិតផ្ដួចផ្ដើមដោយសម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា។ គម្រោង​ព្រែក​ជីកហ្វូណន​តេជោនេះមានប្រវែង ១៨០គីឡូម៉ែត្រដោយតភ្ជាប់ប្រព័ន្ធដៃទន្លេមេគង្គ និងផ្លូវសមុទ្រ ឆ្លង​កាត់​ខេត្តកណ្ដាល តាកែវ កំពត និងខេត្តកែប។

ជាការមើលឃើញរបស់យុវជន ក៏មិនខុសពីប្រជាពលរដ្ឋទូទៅនោះទេ។ យុវជនបង្ហាញ​ជា​ការ​គាំទ្រ​យ៉ាង​មុត​មាំទៅលើគម្រោងមួយនេះ។ ពួកគេចង់ឃើញ ព្រែកជីកហ្វូណនតេជោ លេច​ឡើង​ជា​រូប​រាង​ឆាប់ៗ និងជឿជាក់ថា ប្រព័ន្ធធារាសាស្ត្រដ៏ធំជាប្រវត្តិសាស្រ្តនេះ នឹងផ្ដល់ជាអត្ថ​ប្រយោជន៍​ធំធេង​លើច្រើនវិស័យ ពិសេសជួយបង្កើនសេដ្ឋកិច្ចជាតិកម្ពុជា ផ្ដល់ផលចំណេញ​ដល់​ប្រជាពលរដ្ឋ​។

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក៏បានលើកឡើងដែរថា កម្ពុជា​នឹង​កសាង​ព្រែក​ជីក​ហ្វូណនតេជោនេះឱ្យបាន។ ការសាងសង់អាចចាប់ផ្ដើមនៅចុងឆ្នាំ២០២៤ ឬដើម​ឆ្នាំ​២០២៥។ សម្ដេចលើកឡើងដែរថា គម្រោងនេះ ប្រើប្រាស់ពេលវេលា ២៦ខែ សម្រាប់​ការ​សិក្សា​លម្អិត ដោយមានការចូលរួមពីអ្នកជំនាញកម្រិតពិភពលោកជិត៥០រូប។

គម្រោងព្រែកជីកហ្វូណនតេជោគ្រោងចំណាយថវិកាសរុបប្រមាណ ១ ៧០០ លានដុល្លារ​អាមេរិក ជាប្រភេទគម្រោងវិនិយោគ BOT (Build-Operate-Transfer)។ ព្រែកជីកនេះ ឆ្លង​កាត់​ខេត្ត​កណ្ដាល តាកែវ កំពត និងខេត្តកែប ដោយមានទីតាំងចាប់ពីព្រែកតាកែវ ឆ្លង​កាត់​ព្រែក​តាឯក ចូលតាមព្រែកតាហ៊ីង និងបន្តរហូតដល់សមុទ្រខេត្តកែប។ ព្រែកជីកនេះ មាន​ទទឹង​ខាង​លើ ១០០ម៉ែត្រ ទទឹងខាងក្រោម ៨០ម៉ែត្រ និងជម្រៅ ៥,៤ម៉ែត្រ។ ព្រែកជីកហ្វូណនតេជោ នេះ​មានសន្ទះផ្លូវនាវាចរណ៍មាន៣កន្លែង ស្ពាន ១១កន្លែងផ្លូវអមសងខាងប្រវែងសរុបប្រមាណ ២០៨គីឡូម៉ែត្រ។ គម្រោងសាងសង់ អាចប្រើប្រាស់ពេលវេលាចំនួន៤ឆ្នាំ៕ អត្ថបទ៖ គឹមហុក