នៅថ្ងៃទី២៩ ខែមេសានេះ ក្រសួងទេសចរណ៍ អង្គការស្វីសខនថាក់ និងភាគីពាក់ព័ន្ធបានប្រារព្ធទិវាជំនាញហូកា ឆ្នាំ២០២៤ ក្រោមប្រធានបទ «វិនិយោគទេសចរណ៍ វិនិយោគធនធានមនុស្ស» នៅរាជធានីភ្នំពេញ។ តាមរយៈទិវាជំនាញហូកានេះក្រុមគ្រូបង្គោល បានបង្ហាញការតាំងចិត្តពង្រីកការបណ្តុះបណ្តាលជំនាញហូកាដល់យុវជន និងអ្នកផ្តល់សេវាទេសចរណ៍សហគមន៍ អភិវឌ្ឍន៍ទេសចរណ៍តាមខេត្តឱ្យមានគុណភាព។
ក្រុមគ្រូបង្គោល និងអ្នកផ្តល់សេវាទេសចរណ៍មកពីតាមខេត្តបានថ្លែងប្រាប់ BTV ថា ក្នុងរយៈពេលប៉ុន្មានឆ្នាំចុងក្រោយនេះ គណៈកម្មការគ្រប់គ្រងគម្រោងហូកា ក្រសួងទេសចរណ៍ និងអង្គការស្វីសខនថាក់ បណ្តុះបណ្តាលគ្រូបង្គោលជាច្រើនជូនដល់មន្ត្រីមន្ទីរទេសចរណ៍ អ្នកជំនាញទេសចរណ៍តាមក្រុមហ៊ុន និងសហគមន៍តាមបណ្តាខេត្តគោលដៅ ហើយក្រុមគ្រូបង្គោល នឹងពង្រីកការបណ្តុះបណ្តាលជំនាញទេសចរណ៍ ជូនបណ្តាយុវជន អ្នកផ្តល់សេវាទេសចរណ៍សហគមន៍តាមបណ្តាខេត្ត ដើម្បីជំរុញការផ្លាស់ប្តូរការងារផ្តល់សេវាទេសចរណ៍ ការបង្កើតការងារ ការបង្កើនចំណូល និងការទាញយកអត្ថប្រយោជន៍នានាទៀតពីវិស័យទេសចរណ៍។
ឯកឧត្តម ប៉ាក សុខុម រដ្ឋលេខាធិការក្រសួងទេសចរណ៍ និងប្រធានគណៈកម្មការគ្រប់គ្រងគម្រោងហូកាថ្លែងថា កម្មវិធីបណ្តុះបណ្តាលបដិសណ្ឋារកិច្ច ហូការដំណាក់កាលទី២ បានអនុវត្តពីឆ្នាំ២០២០ដល់ឆ្នាំ២០២៤ បានបណ្តុះបណ្តាលគ្រូបង្គោល និងអ្នកជំនាញទេសចរណ៍បានចំនួនជាង ៤៥០០នាក់ ក្នុងដំណាក់កាលបន្តបន្ទាប់ទៀតនេះ ក្រសួងទេសចរណ៍បាននិងកំពុងស្នើអង្គការស្វីសខនថាក់ពង្រីកការរៀបចំគុណវុឌ្ឍិ បណ្តុះបណ្តាលជំនាញវិជ្ជាជីវៈទេសចរណ៍ វិញ្ញាបនបត្រC1 បន្តរៀបចំC2 ដើម្បីគាំទ្រការអនុវត្តកម្មវិធីរាជរដ្ឋាភិបាល បណ្តុះបណ្តាលជំនាញវិជ្ជាជីវៈជូនយុវជនឲ្យបាន១លាន៥សែននាក់។
លោក Chistian Volker ide( គ្រីស្ទៀន វូឃ័រ អ៊ីឌ័រ) ប្រធានកម្មវិធីអភិវឌ្ឍន៍ជំនាញ ថ្លែងថា អង្គការស្វីសខនថាក់ និងសហការជាមួយក្រសួងទេសចរណ៍ និងភាគីពាក់ព័ន្ធ បានពង្រីកការបណ្តុះបណ្តាលគ្រូបង្គោលថ្នាក់ជាតិ ថ្នាក់មូលដ្ឋាន ដើម្បីជំរុញគ្រូបង្គោលពង្រីកបណ្តុះបណ្តាលជំនាញទេសចរណ៍ជូនយុវជន និងអ្នកផ្តល់សេវាទេសចរណ៍នានាទៀតដើម្បីជំរុញការអភិវឌ្ឍតាមសហគមន៍ទេសចរណ៍ អាជីវកម្មទេសចរណ៍តាមមូលដ្ឋានលើការផ្តល់សេវាទេសចរណ៍ប្រកបដោយគុណភាព សុវត្ថិភាព និងភាពកក់ក្តៅ៕ អត្ថបទ៖ ស៊ុម សុខជា