ទាហានជើងទឹកអ៊ុយក្រែនមា្នក់ បានប្រាប់ឲ្យដឹងថា រូបគេបានស៊ូទ្រាំនឹងការធ្វើទារុណកម្មទាំងផ្លូវកាយ និងផ្លូវចិត្តរយៈពេល ៩ខែ ក្នុងនាមជាអ្នកទោសសង្គ្រាមរបស់រុស្ស៊ី ប៉ុន្តែត្រូវបានឲ្យពេលសម្រាក និងស្តារនីតិសម្បទាឡើងវិញ ក្នុងរយៈពេលត្រឹមតែ ៣ខែប៉ុណ្ណោះ មុនពេលត្រូវបានបញ្ជាឲ្យត្រឡប់ទៅអង្គភាពរបស់ខ្លួនវិញ។

នាយទាហានរូបនេះដែលសុំឲ្យស្គាល់អត្តសញ្ញាណត្រឹមឈ្មោះ Smiley បានត្រឡប់ទៅបំពេញកាតព្វកិច្ចវិញដោយស្ម័គ្រចិត្ត។ ប៉ុន្តែវាត្រឹមតែជាពេលវេលាដែលរូបគេបានទទួលការហ្វឹកហ្វឺនផ្នែកប្រយុទ្ធយ៉ាងខ្លាំងក្លា ពោលគឺនៅប៉ុនានសប្តាហ៍បន្ទាប់ពីការរងរបួសទាំងផ្លូវកាយ និងផ្លូវចិត្តយ៉ាងខ្លាំងក្លា បានចាប់ផ្តើមលេចរូបរាងឡើង។

រូបគេបាននិយាយថា៖ «ខ្ញុំបានចាប់ផ្តើមមានការចងចាំឡើងវិញ និងសុបិនអាក្រក់។ ខ្ញុំគេងបានតែ ២ម៉ោងប៉ុណ្ណោះ ហើយភ្ញាក់ឡើងដោយកន្លែងដេកទទឹកជោក»។ រូបគេត្រូវបានធ្វើរោគវិនិច្ឆ័យថា មានជម្ងឺស្ត្រេសក្រោយមានការប៉ះទង្គិចផ្លូវចិត្ត ហើយត្រូវបានបញ្ជូនទៅកាន់ការថែទាំផ្លូវចិត្ត និងនៅតែទទួលការព្យាបាលជាប់ជានិច្ច។

អតីតអ្នកទោស មន្ត្រី និងអ្នកចិត្តសាស្រ្ត បាននិយាយថា អ៊ុយក្រែនទើបតែចាប់ផ្តើមយល់ពីផលប៉ះពាល់យូរអង្វែងនៃការប៉ះទង្គិចដែលអ្នកទោសសង្គ្រាមបានជួបប្រទះនៅក្នុងការជាប់ឃុំឃាំងរបស់រុស្ស៊ី ប៉ុន្តែប្រទេសនេះបាន និងកំពុងមិនបានព្យាបាលពួកគេឲ្យបានត្រឹមត្រូវ ហើយបញ្ជូនពួកគេឲ្យត្រឡប់ទៅបំពេញកាតព្វកិច្ចវិញលឿនពេក។

គួរបញ្ជាក់ដែរថា អ្នកទោសសង្គ្រាមអ៊ុយក្រែនជិត ៣.០០០នាក់ត្រូវបានដោះលែងពីប្រទេសរុស្ស៊ី នៅក្នុងការដោះដូរអ្នកទោស ចាប់តាំងពីការលុកលុយ បានចាប់ផ្តើមឡើងនៅឆ្នាំ២០២២។ ហើយមនុស្សជាង ១០.០០០នាក់នៅតែស្ថិតក្នុងការឃុំឃាំងរបស់រុស្ស៊ី ដែលខ្លះបានស៊ូទ្រាំនឹងលក្ខខណ្ឌរយៈពេល ២ឆ្នាំ ដែលអ្នកជំនាញរបស់អង្គការសហប្រជាជាតិបានពិពណ៌នាថា ជារឿងដ៏គួរឲ្យរន្ធត់ណាស់។

ចំណែកលោក Andriy Kostin អគ្គរដ្ឋអាជ្ញារបស់អ៊ុយក្រែនបាននិយាយកាលពីខែកញ្ញាថា៖ «ប្រហែល ៩០ភាគរយនៃអ្នកទោសសង្គ្រាមអ៊ុយក្រែនត្រូវទទួលរងនូវការធ្វើទារុណកម្ម ការចាប់រំលោភសេពសន្ថវៈ ការគំរាមកំហែងអំពើហិង្សាផ្លូវភេទ ឬទម្រង់នៃការប្រព្រឹត្តអាក្រក់ផ្សេងទៀត»។ យោធារុស្ស៊ីមិនបានឆ្លើយតបនឹងសំណើសុំការអត្ថាធិប្បាយលើការចោទប្រកាន់ពីបទធ្វើបាបអ្នកទោសសង្គ្រាមអ៊ុយក្រែននេះទេ៕