អនាគតថាមពលរបស់សហរដ្ឋអាមេរិក អាចនឹងប្រឈមជាមួយហានិភ័យ ក្នុងការបោះឆ្នោតប្រធានាធិបតីខែវិច្ឆិកា។ ប្រធានាធិបតីក្នុងតំណែងលោក Joe Biden បានសន្យាថា នឹងផ្តាច់ប្រទេសចេញពីការប្រើប្រាស់ឥន្ធនៈហ្វូស៊ីល ខណៈដែលបេក្ខជនប្រធានាធិបតីរបស់គណបក្សសាធារណរដ្ឋលោក Donald Trump បែរជាបានបង្ហាញថា លោកនឹងធ្វើផ្ទុយ។

រដ្ឋ New Mexico ត្រូវបានដាក់ជារដ្ឋមួយដែលមានសក្តានុពលដ៏ធំ សម្រាប់ទាំងប្រភពថាមពលកកើតឡើងវិញ និងមិនកកើតឡើងវិញ ប៉ុន្តែមានការព្រួយបារម្ភថា ការផ្លាស់ប្តូររដ្ឋបាល អាចប៉ះពាល់ដល់ដំណើរផ្លូវថាមពលរបស់រដ្ឋនេះនាពេលខាងមុខ។

គួរបញ្ជាក់ថា រដ្ឋ New Mexico គឺជារដ្ឋផលិតប្រេងធំជាងគេទី២ នៅក្នុងប្រទេសបន្ទាប់ពីរដ្ឋ Texas។ បើយោងតាមរដ្ឋបាលព័ត៌មានថាមពលសហរដ្ឋអាមេរិក បានឲ្យដឹងថា រដ្ឋនេះមានចំនួនច្រើនជាង ១៣ភាគរយនៃផលិតកម្មប្រេងឆៅសរុបរបស់សហរដ្ឋអាមេរិក ក្នុងឆ្នាំ២០២២ ដោយមានកម្រិតខ្ពស់បំផុតប្រហែល ៥៧៤លានបារ៉ែល។

បច្ចេកវិជ្ជាខួងយកប្រេង និងទាញយកប្រេងកម្រិតខ្ពស់ បានជួយឲ្យផលិតកម្មប្រេងឆៅរបស់រដ្ឋកើនឡើងគួរឲ្យកត់សម្គាល់ ចាប់តាំងពីឆ្នាំ២០១០។ តែទោះជាយ៉ាងណាក្ដី សមាជិកសភារបស់រដ្ឋនេះ ក៏បាននិងកំពុងប្រឹងប្រែងធ្វើឲ្យប្រភពថាមពលមិនប៉ះពាល់បរិស្ថានជាងមុន។

រដ្ឋបានសន្យាកាត់បន្ថយការបំភាយឧស្ម័នផ្ទះកញ្ចក់យ៉ាងហោចណាស់ ៤៥ភាគរយពីកម្រិត ឆ្នាំ២០០៥ មកចុងបញ្ចប់នៃទសវត្សរ៍នេះ។ នាយកការិយាល័យថាមពលរបស់រដ្ឋ លោកស្រី Rebecca Puck Stair បាននិយាយថា៖ «យើងបានអនុម័តច្បាប់ផ្លាស់ប្តូរថាមពលកាលពីប៉ុន្មានឆ្នាំមុន ដែលកំណត់គោលដៅ សម្រាប់រដ្ឋ New Mexico»៕