ប្រធានាធិបតីកូរ៉េខាងត្បូងលោក Yoon Suk Yeol ជួបជាមួយមេដឹកនាំគណបក្សប្រឆាំង លោក Lee Jae-myung ដើម្បីពិភាក្សាគ្នា នៅថ្ងៃចន្ទ (ទី២៩ ខែមេសា) នេះ ដោយជំនួបនេះកើតមានឡើងបន្ទាប់ពីគណបក្សកាន់អំណាចរបស់លោកមេដឹកនាំរូបនេះបានរងបរាជ័យដ៏គួរឲ្យអាម៉ាស់ ក្នុងការបោះឆ្នោត រហូតនាំឲ្យមានការអំពាវនាវយ៉ាងទូលំទូលាយឲ្យរូបលោកផ្លាស់ប្តូររបៀបដឹកនាំរបស់ខ្លួន។

គួរបញ្ជាក់ថា គណបក្សអំណាចប្រជាជន (PPP) របស់លោក Yoon មិនអាចជ្រៀតចូលទៅបំផ្លាញការក្តាប់អំណាចរបស់គណបក្សប្រឆាំង នៅសភា ក្នុងការបោះឆ្នោតថ្ងៃទី១០ ខែមេសា ដែលលទ្ធផលនេះត្រូវបានគេមើលឃើញយ៉ាងទូលំទូលាយថា ជាការបោះឆ្នោតប្រជាមតិលើការកាន់អំណាច ២ឆ្នាំដំបូងរបស់មេដឹកនាំអភិរក្សនិយមរូបនេះ។

កិច្ចប្រជុំនេះ គឺជាលើកទី១ ដែលលោក Yoon បានធ្វើឡើងជាមួយលោក Lee គិតចាប់តាំងពីការឡើងកាន់តំណែង ហើយកើតមានឡើង ខណៈដែលអ្នកវិភាគបាននិយាយថា រូបលោកប្រហែលជាបានធ្លាក់ចូលទៅក្នុងស្ថានភាពទន់ខ្សោយ បន្ទាប់ពីជំហរនយោបាយប្រយុទ្ធរបស់លោកហាក់ដូចជាបានធ្វើឲ្យអ្នកបោះឆ្នោតជាច្រើនលែងសូវចាប់អារម្មណ៍។ ទាំងគណបក្សប្រឆាំង និងគណបក្ស PPP ផ្ទាល់ បានជំរុញឲ្យលោក Yoon ផ្លាស់ប្តូរផ្លូវដឹកនាំរបស់ខ្លួន ជាពិសេសបន្ទាប់ពីរូបលោកហាក់ជាបានបដិសេធលទ្ធផលបោះឆ្នោត ដែលបានធ្វើឲ្យចំណាត់ថ្នាក់នៃសំឡេងគាំទ្រលើលោក នៅក្នុងការស្ទង់មតិ ធ្លាក់ចុះដល់ចំណុចទាបបំផុតប្រហែល ២០ភាគរយ។

ក្រៅពីបញ្ហាប្រឈមផ្សេងៗ លោក Yoon ក៏ជួបប្រទះនឹងបញ្ហាតានតឹងធំមួយទៀតផងដែរ នោះគឺការជំរុញរបស់លោក ដើម្បីឲ្យមានកំណែទម្រង់ការថែទាំសុខភាព។ កាលពីជាង ២ខែមុន ក្រុមគ្រូពេទ្យវ័យក្មេងបានដើរចេញពីការងាររបស់ពួកគេ ដើម្បីបង្ហាញការតវ៉ាលើផែនការស្នូលនៃការបង្កើនចំនួនគ្រូពេទ្យ ហើយមនុស្សជាច្រើនទៀតកំពុងគំរាមចូលរួមក្នុងការតវ៉ានេះ។ 

តែយ៉ាងណាក្ដី មានចម្ងល់អំពីថា តើកិច្ចប្រជុំ នាថ្ងៃចន្ទនេះ នឹងអាចធ្វើឲ្យរកឃើញផ្លូវចេញ ដើម្បីដោះស្រាយភាពជាប់គាំង ក្នុងរដ្ឋាភិបាល ឬអត់។ គណបក្សប្រជាធិបតេយ្យ (DP) របស់លោក Lee កំពុងគ្រប់គ្រងយ៉ាងរឹងមាំ នៅក្នុងសភា ដែលរារាំងដល់លទ្ធភាពរបស់លោក Yoon ក្នុងការអនុម័តច្បាប់ផ្សេង៕