ភ្នំពេញ ៖ មានហេតុការណ៍រលំដើមឈើ២ករណីផ្សេងគ្នា ក្នុងមូលដ្ឋានខណ្ឌទួលគោក ដែលបានបណ្តាលឱ្យមនុស្សម្នាក់បានស្លាប់ពេលបញ្ចូនទៅសង្គ្រោះដល់មន្ទីរពេទ្យ និងយានយន្តចំនួន០៣គ្រឿងបានទទួលរងការខូចខាត ។ 

ករណីទី១បានកើតឡើង នាវេលាល្ងាចថ្ងៃទី២៨ មេសា ឆ្នាំ២០២៤ម្សិលមិញ ដោយមានដើមឈើងាប់១ដើមធំ បានរលំសង្កត់លើបុរសម្នាក់គ្រាកំពុងជិះម៉ូតូធ្វើដំណើរតាមបណ្តោយផ្លូវសហព័ន្ធរុស្ស៊ី ក្បែរគល់ស្ពានអាកាស៧មករា ក្នុងសង្កាត់ទឹកល្អក់ទី១ ដែលបណ្តាលឱ្យរងរបួសចំក្បាលធ្ងន់ធ្ងរ ហើយក៏បានស្លាប់ពេលបញ្ចូនដល់មន្ទីរពេទ្យ ។ 

ចំណែកករណីទី០២ បានកើតឡើង នារសៀលថ្ងៃទី២៩ ខែមេសា ឆ្នាំ២០២៤នេះតែម្តង នៅតាមបណ្តោយផ្លូវលេខ៣១៧ ក្នុងសង្កាត់ទឹកល្អក់ទី១ ខណ្ឌទួលគោកដដែល ដោយដើមឈើធំមួយដើមបានរលំសង្កត់ទៅលើរថយន្តស៊េរីទំនើបមួយគ្រឿង និងផាស់អាប់០១គ្រឿង បណ្តាលឱ្យរងការខូចខាត ប៉ុន្តែមិនមានបណ្តាលឱ្យមនុស្សណាម្នាក់ រងរបួសនោះឡើយ ។ 

ចំពោះហេតុការណ៍ទាំង២ករណីនេះ មិនទាន់មានប្រភពបញ្ជាក់បាននៅឡើយទេ ថា នណារជាអ្នកទទួលខុសត្រូវលើការរងគ្រោះរបស់ពលរដ្ឋ ដែលបានបាត់បង់អាជីវិត នឹងអ្នកដែលរងការខូចខាតទ្រព្យសម្បត្តិ ជាដើម ៕ ដោយ ៖ លីហេង