ប្រធានាធិបតីចិនលោក Xi Jinping (ស៊ី ជីនពីង) នឹងធ្វើទស្សនកិច្ចនៅប្រទេសបារាំង ស៊ែប៊ី និងហុងគ្រី ចាប់ពីថ្ងៃទី៥ ដល់ថ្ងៃទី១០ ខែឧសភា ដែលជាដំណើរទស្សនកិច្ចនៅអឺរ៉ុបលើកដំបូងរបស់លោក ក្នុងរយៈពេល ៥ឆ្នាំ ដោយការធ្វើដំណើរទៅនេះ គឺមានគោលបំណងជំរុញដល់ទំនាក់ទំនងសហភាពអឺរ៉ុប (EU) ខណៈដែលភាពតានតឹងជាមួយប្រទេសសេដ្ឋកិច្ចធំបំផុតជាងគេទី២ របស់ពិភពលោកមួយនេះ កើនឡើងជាលំដាប់។

នៅក្នុងកិច្ចពិភាក្សាអំពីដំណើរទស្សនកិច្ចរបស់លោក ស៊ី ទៅកាន់ប្រទេសបារាំង អ្នកនាំពាក្យក្រសួងការបរទេសចិន លោក Lin Jian បាននិយាយថា ទំនាក់ទំនងទ្វេភាគីជាមួយបារាំងបន្តរក្សាបាននូវសន្ទុះវិវត្តន៍ទៅមុខយ៉ាងល្អប្រសើរ ហើយប្រទេសទាំង២ មានទំនាក់ទំនងជាយុទ្ធសាស្ត្រ និងកិច្ចសហប្រតិបត្តិការជាក់ស្តែង។

នៅឯសន្និសីទសារព័ត៌មានប្រចាំថ្ងៃ លោក Lin បាននិយាយថា៖ «វាដល់ពេលវេលាហើយ ក្នុងការជំរុញភាពជាដៃគូយុទ្ធសាស្ត្រគ្រប់ជ្រុងជ្រោយ រវាងប្រទេសចិន និងបារាំងឲ្យឆ្ពោះទៅកាន់កម្រិតថ្មីមួយ ហើយផ្តល់កម្លាំងរុញច្រានថ្មីដល់ការវិវត្តប្រកបដោយភាពល្អប្រសើរល្អនៃទំនាក់ទំនងចិន-សហភាពអឺរ៉ុប ដើម្បីរួមចំណែកថ្មីដល់សន្តិភាព ស្ថិរភាព ការអភិវឌ្ឍ និងវឌ្ឍនភាពពិភពលោក»។

អ្នកនាំពាក្យរូបនេះ បានបន្ថែមថា៖ «ប្រទេសចិនទន្ទឹងរង់ចាំធ្វើការជាមួយបារាំង ដើម្បីបង្កើនទំនុកចិត្តដល់គ្នាទៅវិញទៅមកទាំងផ្នែកនយោបាយ សាមគ្គីភាព និងកិច្ចសហប្រតិបត្តិការ»។

គួរបញ្ជាក់ថា ជម្លោះពាណិជ្ជកម្មសងសឹកគ្នាទៅវិញទៅមកជាមួយ EU បានធ្វើឲ្យទំនាក់ទំនងចិន-បារាំងមានសភាពកាន់តែយ៉ាប់យ៉ឺនខ្លាំងឡើងៗ នៅពេលដែលទីក្រុងប៉ារីសបានគាំទ្រដល់ការស៊ើបអង្កេតរបស់គណៈកម្មការអឺរ៉ុបប្រឆាំងនឹងការឧបត្ថម្ភធន ចំពោះការនាំចូលរថយន្តអគ្គិសនីរបស់ចិន។ បន្ទាប់មក ប្រទេសចិនបានបើកការស៊ើបអង្កេតប្រឆាំងការលក់តម្លៃថោកលើស្រាគោញាក់ ជាវិធានការមួយដែលត្រូវបានគេមើលឃើញថា បាញ់ឆ្ពោះទៅបារាំង៕