ជប៉ុន៖ ទីប្រឹក្សាជាន់ខ្ពស់ផ្នែកវេជ្ជសាស្ត្រ របស់ប្រទេសជប៉ុនបានព្រមានកាលពីថ្ងៃពុធ ប្រទេសនេះប្រឈមនឹងស្ថានភាពធ្ងន់ធ្ងរបំផុតរបស់ខ្លួន ចាប់តាំងពីការឆ្លងរាលដាលនៃជំងឺរាតត្បាតសកល COVID-19 បានចាប់ផ្ដើមផ្ទុះដោយជំរុញឱ្យរដ្ឋាភិបាលបញ្ជូនសារកាន់តែច្បាស់ និងខ្លាំងក្លាជាងមុនអំពីហានិភ័យដែលកំពុងកើនឡើង រួមទាំងប្រព័ន្ធវេជ្ជសាស្ត្រ។
ប្រព័ន្ធផ្សព្វផ្សាយបានរាយការណ៍ថា ទីក្រុងតូក្យូដែលជាម្ចាស់ផ្ទះព្រឹត្តិការណ៍អូឡាំពិកឆ្នាំនេះ បានកត់ត្រាករណីឆ្លងថ្មីនៃជំងឺ COVID-19 ចំនួន ៣,១៧៧នាក់កាលពីថ្ងៃពុធ ដែលកើនឡើងដល់កម្រិតខ្ពស់បំផុតប្រចាំថ្ងៃក្នុងរយៈពេល ២ថ្ងៃជាប់ៗគ្នា ខណៈការឆ្លងរាលដាលកាន់តែខ្លាំងដាក់សម្ពាធលើមន្ទីរពេទ្យ។ ករណីឆ្លងថ្មីទូទាំងប្រទេសបានឡើងដល់ជាង ៩.៥០០ ជាលើកដំបូង។ ទីប្រឹក្សាជាន់ខ្ពស់ផ្នែកវេជ្ជសាស្ត្រ លោក Shigeru Omi បានប្រាប់ក្រុមសមាជិកសភាថា វិបត្តិដ៏ធ្ងន់ធ្ងរបំផុតនេះគឺថា សង្គមពុំបានចែករំលែកការយល់ដឹងពីហានីភ័យទេ។ សម្រាប់ចំនួនករណីឆ្លងនៅទីក្រុងតូក្យូបានកើនឡើងលើសពី ៣.០០០នាក់ ហើយនេះអាចមានប្រសិទ្ធភាពក្នុងការប្រកាសខ្លះៗ។ ដើម្បីកុំឲ្យខកខានឱកាសនេះ ខ្ញុំចង់អោយរដ្ឋាភិបាលផ្ញើសារដែលខ្លាំង និងច្បាស់ជាងនេះ។
ការកើនឡើងនៃការឆ្លងបានបន្ថែមការព្រួយបារម្ភ អំពីព្រឹត្តិការណ៍កីឡាដែលកំពុងប្រព្រឹត្តទៅ ក្រោមលក្ខខណ្ឌដែលមិនធ្លាប់មានពីមុនមក រួមទាំងការហាមឃាត់អ្នកទស្សនាមិនឲ្យចូលទស្សនាដោយផ្ទាល់ នៅតាមកន្លែងភាគច្រើន។ ការកើនឡើងនេះក៏ដាក់បន្ទុកបញ្ហាដល់លោកនាយករដ្ឋមន្ត្រី Yoshihide Suga ផងដែរ ដែលប្រជាប្រិយភាពរបស់លោកបានធ្លាក់ទាបបំផុត ចាប់តាំងពីលោកឡើងកាន់តំណែងកាលពីខែកញ្ញា មុនការប្រជែងធ្វើជាអ្នកដឹកនាំបក្សកាន់អំណាច និងការបោះឆ្នោតសកលនៅឆ្នាំនេះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
