ប្រមុខអង្គការណាតូ (NATO) លោក Jens Stoltenberg នៅថ្ងៃចន្ទ (ទី២៩ ខែមេសា) នេះ បានប្រាប់ប្រជាជនអ៊ុយក្រែនថា សមាជិកនៃសម្ព័ន្ធភាពយោធារបស់លោក មិនបានធ្វើតាមការសន្យារបស់ខ្លួន ក្នុងការផ្ដល់ជំនួយយោធាក្នុងរយៈពេលប៉ុន្មានខែថ្មីៗនេះ ប៉ុន្តែបាននិយាយថា លំហូរនៃអាវុធ និងគ្រាប់រំសេវ ឥឡូវនេះនឹងកើនឡើងជាក់ជាមិនខាន។

ដោយមិនបានប្រាប់ឲ្យដឹងពីដំណើរទស្សនកិច្ចរបស់លោកទៅកាន់អ៊ុយក្រែននោះ អគ្គលេខាធិការនៃសម្ព័ន្ធយោធាឆ្លងមហាសមុទ្រអាត្លង់ទិក បានជួបពិភាក្សាជាមួយប្រធានាធិបតីអ៊ុយក្រែន លោក Volodymyr Zelenskiy ហើយគ្រោងនឹងថ្លែងសុន្ទរកថាទៅកាន់សភាអ៊ុយក្រែន ឬសភា Rada។

គួរបញ្ជាក់ថា ដំណើរទស្សនកិច្ចរបស់លោក Stoltenberg ដែលជាលើកទី៣ គិតចាប់តាំងពីមានការលុកលុយពេញលេញរបស់រុស្ស៊ីលើអ៊ុយក្រែន ក្នុងខែកុម្ភៈ ឆ្នាំ២០២២ កើតមានឡើងក្នុងគ្រាដែលអ៊ុយក្រែនជួបនឹងការលំបាក នៅសមរភូមិ។ បន្ទាប់ពីការវាយបករបស់អ៊ុយក្រែន រងបរាជ័យកាលពីឆ្នាំមុន កងកម្លាំងរុស្ស៊ីបានមានប្រៀប ដោយយ៉ាងហោចណាស់ក៏មួយផ្នែក ដោយសារតែការខ្វះខាតអាវុធ និងគ្រាប់រំសេវដែលផ្ដល់ដោយដៃគូលោកខាងលិចរបស់ទីក្រុងគីវដែរ។

លោក Stoltenberg បាននិយាយថា៖ «ខ្ញុំនឹងស្មោះត្រង់ទាំងជាមួយប្រធានាធិបតីលោក Zelenskiy និងសភា Rada ដែលសម្ព័ន្ធមិត្តរបស់អង្គការណាតូ មិនបានផ្ដល់នូវអ្វីដែលយើងបានសន្យាក្នុងរយៈពេលប៉ុន្មានខែចុងក្រោយនេះ។ សហរដ្ឋអាមេរិកបានចំណាយពេល ៦ខែ ទើបបានយល់ព្រមលើកញ្ចប់ជំនួយ ហើយសម្ព័ន្ធមិត្តអឺរ៉ុបមិនបានផ្តល់គ្រាប់រំសេវដែលយើងបានសន្យានោះទេ។ ប៉ុន្តែឥឡូវនេះ ខ្ញុំមានទំនុកចិត្តថា អ្វីៗនឹងផ្លាស់ប្តូរជាមិនខាន»៕