​បាល់ទាត់៖ ​ក្លិប​អង់គ្លេស Portsmouth បានសំរេច​បញ្ចប់​កុងត្រា​កីឡាករ​របស់ខ្លួន ៣នាក់ បន្ទាប់ពី​រកឃើញថា​ ពួកគេ​បាន​ប្រើប្រាស់​ពាក្យសំដី​មិន​សមរម្យរើសអើង​ កីឡាករ​ក្រុម​ជំរើសជាតិ​អង់គ្លេស​ដែល​ចាញ់​អ៊ីតាលី​នៅ​វគ្គ​ផ្តាច់ព្រ័ត្រ Euro ២០២០ កន្លងមក​។

​​ក្រុម​អង់គ្លេស​បាន​ចាញ់​អ៊ីតាលី​នៅ​វគ្គ ១១ម៉ែត្រ​កាត់សេចក្តី​នៅ​វគ្គ​ផ្តាច់ព្រ័ត្រ​កាលពី​ថ្ងៃទី១១ ខែកក្កដា​នៅ​កីឡដ្ឋាន Wembley​។ ​កីឡាករ​ ៣នាក់​របស់ Portsmouth ដែល​មិន​ត្រូវបាន​បញ្ចេញ​ឈ្មោះ​ត្រូវបាន​គេ​រកឃើញថា​ បាន​ប្រើពាក្យ​មិន​សមរម្យរើសអើង​ពណ៌​សម្បុរ​នៅលើ​បណ្តាញ​សង្គម ជាពិសេស​គឺ​បាញ់​សំដៅលើ Bukayo Saka, Marcus Rashford និង Jadon Sancho ដែល​ស៊ុត ១១ម៉ែត្រ​មិន​ចូល​។ ​នាយករដ្ឋមន្ត្រី​អង់គ្លេស ​លោក Boris Johnson បាន​ថ្កោលទោស​ការរំលោភបំពាន​ប្រកាន់​ជាតិ​សាសន៍ ​ទៅលើ​កីឡាករ​ក្រុមបាល់ទាត់​អង់គ្លេស ​បន្ទាប់ពី​ពួកគេ​បាន​បរាជ័យ​ក្នុងការ​ប្រកួត​វគ្គ​ផ្តាច់ព្រ័ត្រ European Championship។​ ​ប៉ូលីស​ក្រុង​ឡុង​ដ៍​បាន​បើក​ការស៊ើបអង្កេត ទៅលើ​ការវាយលុក​លើ​បណ្តាញ​សង្គម​ដែល​បាន​ផ្តោត​លើ​កីឡាករ​ស្បែក​ខ្មៅ​ចំនួន ៣នាក់​រួមមាន Marcus Rashford, Jadon Sancho និង Bukayo Saka ដែល​ពួកគេ​ទាំង ៣នាក់​ស៊ុត​បាល់ ១១ម៉ែត្រ​កាត់សេចក្តី​មិន​ចូល​។​

ផ្ទាំង​គំនូរ​របស់ Marcus Rashford នៅ​លើ​ជញ្ជាំង​ហាង​កាហ្វេ​មួយ​នៅ​ភាគខាងត្បូង​ទីក្រុង Manchester ក៏ត្រូវ​បាន​គេ​ធ្វើ​ឱ្យ​ខូច​ទ្រង់ទ្រាយ ​បន្ទាប់ពី​បរាជ័យ​របស់​អង់គ្លេស​នៅ​វគ្គ​ផ្តាច់​ព្រ័ត្រ​។​ ​ការរំលោភ​បំពាន​ការរើសអើង​ជាតិ​សាសន៍ ​ដែល​ត្រូវបាន​ថ្កោលទោស​ថា​ជា​ទង្វើរ "​មិន​អាច​លើកលែង​បាន​" ស្រប​ពេល​អ្នកចាត់ការ​អង់គ្លេស ​លោក Gareth Southgate ធ្លាប់បាន​អំពាវនាវ​ដល់​ក្រុមហ៊ុន​ប្រព័ន្ធ​ផ្សព្វផ្សាយ​សង្គម​ដូចជា Facebook រឺ Twitter ឱ្យធ្វើ​អ្វី​បន្ថែមទៀត​ក្នុង​ការតាមប្រមាញ់​ជន​ល្មើស​នៃ​ការរំលោភបំពាន​នេះ​៕

​អត្ថបទ​៖​នាង សុភា​វុ​ធ​

​