ភ្នំពេញ ៖ ក្រសួងពាណិជ្ជកម្មកម្ពុជា បានឲ្យដឹងថា គិតត្រឹមខែមេសា ឆ្នាំ២០២៤នេះ កម្ពុជាទទួលបានពាក្យស្នើរសុំចុះបញ្ជីម៉ាកចំនួន ១៣ម៉ឺនម៉ាក ខណៈគិតត្រឹមបំណាច់ឆ្នាំ២០២៣ ការចុះបញ្ជីម៉ាកតាមប្រព័ន្ធជាតិ និងប្រព័ន្ធអន្តរជាតិមានចំនួនជាង ៩,២៨២។

​លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម នៅក្នុងប្រារព្ធទិវាកម្មសិទ្ធិបញ្ញាពិភពលោក ឆ្នាំ២០២៤ ក្រោមមូលបទ “កម្មសិទ្ធិបញ្ញា និងគោលដៅអភិវឌ្ឍប្រកបដោយចីរភាព៖ ការកសាងអនាគតរួមគ្នាជាមួយនឹងនវានុវត្តន៍ និងគំនិតច្នៃប្រឌិត” កាលពីព្រឹកថ្ងៃទី៣០ ខែមេសានេះ បានលើកឡើងពីតួនាទីសំខាន់របស់កម្មសិទ្ធិបញ្ញាដែលជាផ្នែកមួយដ៏សំខាន់ និងមិនអាចខ្វះបានក្នុងវិស័យពាណិជ្ជកម្ម និងក្នុងការជំរុញកំណើនសេដ្ឋកិច្ច។ ដោយក្នុងនោះ កម្មសិទ្ធិបញ្ញា គឺជាឧបករណ៍មួយដ៏ចាំបាច់ក្នុងការជំរុញពាណិជ្ជកម្មទំនិញ និងពាណិជ្ជកម្មសេវាកម្ម ការជំរុញធុរកិច្ចថ្មី និងសហគ្រាសមីក្រូ តូច និងមធ្យម និងវិនិយោគផ្ទាល់ពីបរទេស តាមរយៈការបង្កើតតម្លៃបន្ថែម ការធ្វើពាណិជ្ជូបនីយកម្ម ការបង្កើតប្រភពហិរញ្ញវត្ថុ ការជំរុញនវានុវត្តន៍ និងការស្រាវជ្រាវនិងការអភិវឌ្ឍ តាមរយៈការផ្ទេរបច្ចេកវិទ្យាជាដើម។

លោកជំទាវរដ្ឋមន្ត្រី បន្ថែមថា ប្រសិនបើមិនមានការពង្រឹងកិច្ចការពារកម្មសិទ្ធិបញ្ញាជាសកល ដែលបានជំរុញនវានុវត្តន៍ ដូចជាការអភិវឌ្ឍ បច្ចេកវិទ្យាបៃតង បច្ចេកវិទ្យាបង្កើនផលិតភាពកសិកម្ម និងការប្រើប្រាស់កម្មសិទ្ធិបញ្ញា ដើម្បីបង្កើនប្រសិទ្ធភាពប្រើប្រាស់ធនធានឱ្យអស់លទ្ធភាព បង្កើតការងារ លើកកម្ពស់ជីវភាព និងសុខុមាលភាពរបស់ប្រជាជននោះ ការសម្រេចបាននូវសូចនាករ ក្នុងគោលដៅអភិវឌ្ឍប្រកបដោយចីរភាពឆ្នាំ២០៣០ នាពេលកន្លងមក គឺមិនអាចសម្រេចបានតាមបំណងនោះទេ។ 

នាឱកាសនោះ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានមានប្រសាសន៍ថា បានរំលេចនូវតម្រូវការចន្ទល់សេដ្ឋកិច្ចថ្មីរបស់កម្ពុជាដើម្បីធានាដល់ការអភិវឌ្ឍប្រកបដោយចីរភាពដែលការណ៍នេះបង្ហាញឱ្យឃើញនូវភាពចាំបាច់នៅក្នុងការជំរុញនវានុវត្តន៍តាមរយៈការលើកកម្ពស់កម្មសិទ្ធិបញ្ញា ការបង្កើតតក្កកម្មថ្មី អភិវឌ្ឍន៍ការសិក្សាស្រាវជ្រាវ ដើម្បីបង្កើនផលិតភាពសេដ្ឋកិច្ច និងបង្កើនភាពប្រកួតប្រជែងរបស់កម្ពុជា។ 

 ទាក់ទិនកម្មសិទ្ធិបញ្ញានេះដែរ អ្នកស្រី ឆា ស្រីនាង ម្ចាស់អាជីវកម្មឈ្មោះ នាងច្នៃ និងកញ្ញា តាន់ សារ៉េន ម្ចាស់អាជីវកម្ម សុផល ចេកឆាបធម្មជាតិ បានឲ្យដឹងថា បច្ចុប្បន្ននេះ ពួកគាត់បានបើកដំណើរការអាជីវកម្មជាយូរឆ្នាំមកហើយ ប៉ុន្តែមិនទាន់បានចុះបញ្ជីការពារម៉ាកនោះទេ ដោយសារការយល់ដឹងនៅមានកម្រិត។ ពួកគាត់ បានឲ្យដឹងទៀតថា នៅថ្ងៃអនាគតខាង នឹងនាំគ្នាចុះបញ្ជីម៉ាក ដើម្បីទទួលបានប្រយោជន៍កាន់តែច្រើនក្នុងការធ្វើអាជីវកម្ម ជាពិសេសធានាបានការប្រកួតប្រជែងលើទីផ្សារ។

លោក Michael Andrew ONG ប្រធាននាយកដ្ឋានប្រចាំតំបន់អាស៊ីនិងប៉ាស៊ីហ្វិច ក្នុងកម្មវិធីខាងលើនេះ បានកោតសសើរដល់ការវិវឌ្ឍយ៉ាងប្រសើរនូវការអភិវឌ្ឍកម្មសិទ្ធិបញ្ញានូវកម្ពុជាដែលកើតចេញពីការយកចិត្តទុកដាក់ និងកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា។ លោកបានរំលេចនូវនិន្នាការពិភពលោកដែលកំពុងឆ្ពោះទៅរកការប្រើប្រាស់ភាពច្នៃប្រឌិត និងគំនិតបង្កើតថ្មីដើម្បីបង្កើតតក្កកម្មថ្មីៗដែលរួមចំណែកដោះស្រាយនូវបញ្ហារួមរបស់ពិភពលោក។ 

លោកបានបញ្ជាក់ថា តក្កកម្មជាង៤.៧ លាន (៣១.៤%) ក្នុងចំណោមតក្កកម្មជាង១៥.២លានដែលមានសុពលភាព មានភាពពាក់ព័ន្ធទៅនឹងគោលដៅអភិវឌ្ឍប្រកបដោយចីរភាព។ ក្នុងន័យនេះ លោកបន្ថែមទៀតថា ប្រព័ន្ធកម្មសិទ្ធិបញ្ញាដែលមានតុល្យភាពនិងប្រសិទ្ធភាពនឹងលើកទឹកចិត្តដល់នវានុវត្តន៍ដែលផ្តល់ជាប្រយោជន៍ រួមដល់សង្គមទាំងមូល។

សូមជម្រាបថា ទន្ទឹមការអបអរទិវាកម្មសិទ្ធិបញ្ញាពិភពលោកឆ្នាំ២០២៤ ក្រសួងពាណិជ្ជកម្ម ក៏បានរៀបចំពិធីសម្ពោធដាក់ឱ្យអនុវត្តជាផ្លូវការនូវគម្រោងពាក់ព័ន្ធកម្មសិទ្ធិបញ្ញាមួយចំនួន រួមមាន៖ គម្រោងកំណើនប្រកបដោយបរិយាបន្ន , គម្រោងកសាងសមត្ថភាព តាមរយៈការបញ្ជ្រាបចំណេះដឹងកម្មសិទ្ធិបញ្ញា សម្រាប់សាលាបណ្តុះបណ្តាលផ្នែករចនា , ការដាក់ឱ្យដំណើរការថ្នាលចល័តសម្រាប់ការចុះបញ្ជីកម្មសិទ្ធិបញ្ញា , ការដាក់ឱ្យដំណើរការប្រព័ន្ធ Moodle សម្រាប់ការបណ្តុះបណ្តាលពីចម្ងាយស្តីពីកម្មសិទ្ធិបញ្ញា និងគម្រោងកម្មវិធីវិភាគកម្មសិទ្ធិបញ្ញាសម្រាប់ធុរកិច្ច៕

អត្ថបទ ៖ ឈិត បូរ៉ាវី