អ្នកវិភាគ លើកឡើងថា ក្នុងរយៈពេល២៥ឆ្នាំកន្លងមកនេះ ក្នុងឋានៈជាសមាជិកអាស៊ាន កម្ពុជា​បាន​រួមចំណែកយ៉ាងសកម្មក្នុងកិច្ចការរក្សាសន្តិភាព និងវិបុលភាពនៅក្នុងតំបន់។

ស្របពេល​ថ្ងៃ​ទី៣០ ខែមេសា ឆ្នាំ២០២៤នេះ ជាខួប២៥ឆ្នាំដែលកម្ពុជាចូលជាសមាជិកអាស៊ាន មាន​អ្នកវិភាគបញ្ហាតំបន់ និងអន្តរជាតិ បានលើកឡើងថា គិតចាប់តាំងពីឆ្នាំ១៩៩៩ ដែល​កម្ពុជា​ចូល​ជា​សមាជិកអាស៊ានមក គឺជាសមរភូមិការទូតយ៉ាងសកម្មរបស់កម្ពុជា ក្នុងឋានៈ​ជា​ប្រធាន​ប្តូរវេន​ចំនួន​៣លើលោកបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា បានលើក​ឡើង​ថា ក្រោយ​ពេល​កម្ពុជា​ចូលជាសមាជិកអាស៊ានពេញលេញបានធ្វើឱ្យកម្ពុជាស្មើមុខស្មើមាត់​រហូត​មាន​ការទទួលស្គាល់ពីប្រទេសមហាអំណាចធំៗ។

លោកបណ្ឌិត អះអាងថា មុនក្លាយជាសមាជិកអាស៊ាន កម្ពុជាធ្លាប់តែជាប្រទេសដែលបណ្តា​ប្រទេស​ដ៏​ទៃ​​ស្រោចស្រង់ ជ្រោមជ្រែង និងផ្តល់យោបល់ ផ្ទុយទៅវិញពេល​នេះ​កម្ពុជា​ចូល​រួម​យ៉ាង​សកម្ម​មិន​ថាទាំងការផ្តល់យោបល់ ឬគំនិតផ្តួចផ្តើមទៅលើបញ្ហានានា ខណៈឆ្នាំ២០២២ កម្ពុជា​បានចូលរួមក្នុងកិច្ចការតំបន់ ជាពិសេសបញ្ហាមីយ៉ាន់ម៉ា។

ជាមួយគ្នា លោកបណ្ឌិត គិន ភា អ្នកតាមដានបញ្ហាអន្តរជាតិ លើកឡើងថា រយៈ​ពេល​២៥​ឆ្នាំ​កន្លង​មក កម្ពុជារួមចំណែកក្នុងការដាក់ចេញ និងជំរុញអនុវត្តនូវគំនិតផ្តួចផ្តើមនានារបស់អាស៊ាន ដើម្បី​ធ្វើ​ឱ្យអាស៊ានកាន់តែរឹងមាំ និងកាន់តែមានសារៈសំខាន់ទ្វេឡើងបន្ថែមទៀត។

លោក​បណ្ឌិត បញ្ជាក់ថា ក្នុងឋានៈជាសមាជិកអាស៊ាន កម្ពុជាបានជួយជំរុញ និងលើក​កម្ពស់​កិច្ច​សហប្រតិបត្តិការលើសសរស្តម្ភទាំង៣យ៉ាងសកម្ម គឺសហគមន៍នយោបាយ-សន្តិសុខអាស៊ាន, សហគមន៍សេដ្ឋកិច្ចអាស៊ាន និងសហគមន៍វប្បធម៌អាស៊ាន រហូតសម្រេចបានសមាហរណកម្ម និងការតភ្ជាប់អាស៊ានពេញលេញស្របតាមផែនការការងារ។

សូមជម្រាបថា ក្រោមការដឹកនាំរបស់សម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា ធ្លាប់​បានបញ្ជាក់ថា មានមូលហេតុសំខាន់ៗចំនួន៤ ដែលនាំឱ្យកម្ពុជាចូលជាសមាជិកអាស៊ាន ក្នុងនោះ រួមមាន៖ កត្តាមិនជ្រៀតជ្រែកចូលកិច្ចការផ្ទៃក្នុងរបស់ប្រទេសសមាជិក, ស្មារតី​សហគមន៍, ការអនុវត្តន៍សេដ្ឋកិច្ចសង្គមទាក់ទងសមាហរណកម្ម និងច្រកទ្វារ​ចេញនៃការទូត​របស់កម្ពុជា។

លើសពីនេះ អាស៊ាន ជាអង្គការតំបន់ដែលបានជួយជំរុញកិច្ចសហប្រតិបត្តិការអន្តររដ្ឋាភិបាល និងជួយសម្រួលការ​ធ្វើសមាហរណកម្មក្នុងចំណោមសមាជិកទាំងអស់ ក្នុងគោលបំណង​សំខាន់​នៃអង្គការនេះ ​គឺការជំរុញនូវកំណើនសេដ្ឋកិច្ច វឌ្ឍនភាពសង្គម និងការវិវត្តសង្គមសម្រាប់សមាជិកទាំងអស់ រួមជាមួយការការពារស្ថិរភាពនៅក្នុងតំបន់ និងការផ្ដល់យន្តការមួយសម្រាប់ប្រទេសជាសមាជិកដើម្បីដោះស្រាយទំនាស់ដោយសន្តិវិធី៕

អត្ថបទ សេក ឧត្តម