តំបន់អាស៊ីអាគ្នេយ៍កំពុងប្រឈមនឹងរលកកម្ដៅរយៈពេល ១សប្តាហ៍ កាលពីថ្ងៃចន្ទ (ទី២៩ ខែមេសា) ខណៈដែលសីតុណ្ហភាពឡើងខ្ពស់បំផុត នាំទៅដល់ការបិទសាលារៀន នៅក្នុងប្រទេសមួយចំនួន ហើយមានការព្រមានអំពីសុខភាពបន្ទាន់ នៅទូទាំងតំបន់។

សិស្សរាប់លាននាក់នៅសាលារដ្ឋទាំងអស់ទូទាំងប្រទេសហ្វីលីពីន ត្រូវបានបញ្ជាឲ្យស្នាក់នៅផ្ទះ នាថ្ងៃចន្ទនោះ បន្ទាប់ពីអាជ្ញាធរបានប្រកាសបិទថ្នាក់រៀនផ្ទាល់រយៈពេល ២ថ្ងៃ។ ដំបូន្មានសំខាន់ សម្រាប់មនុស្សគ្រប់គ្នា នៅគ្រប់ទីកន្លែង គឺត្រូវចៀសវាងសកម្មភាពក្រៅផ្ទះ និងបរិភោគទឹកឲ្យបានច្រើន ប៉ុន្តែក្មេងៗ និងមនុស្សចាស់ត្រូវបានប្រាប់ឲ្យប្រុងប្រយ័ត្នជាពិសេស។

ដូចគ្នាដែរ ព្រះរាជាណាចក្រកម្ពុជាឆ្នាំនេះ កំពុងប្រឈមនឹងសីតុណ្ហភាពឡើងខ្ពស់បំផុត ក្នុងរយៈពេល ១៧០ឆ្នាំ។ ចំណែកនាយកដ្ឋានឧតុនិយមរបស់សហភាពមីយ៉ាន់ម៉ា បានឲ្យដឹងនៅថ្ងៃចន្ទនោះដែរថា ទីប្រជុំជនចំនួន ៧ នៅភាគកណ្តាលតំបន់ Magway, Mandalay, Sagaing និង Bago បានជួបប្រទះនឹងសីតុណ្ហភាពឡើងខ្ពស់បំផុត។ ទីក្រុងជាច្រើននៅមីយ៉ាន់ម៉ា កាលពីសប្តាហ៍មុន គឺស្ថិតនៅក្នុងបញ្ជីទីកន្លែងដែលក្តៅបំផុត នៅទូទាំងពិភពលោក។

ហ្វីលីពីនស្ថិតក្នុងចំណោមប្រទេសដែលរងផលប៉ះពាល់ខ្លាំងបំផុត ដោយអាកាសធាតុក្តៅខ្លាំងនៅអាស៊ីអាគ្នេយ៍ ដែលកម្ដៅរដូវក្តៅត្រូពិកកាន់តែអាក្រក់ទៅៗដោយសារសំណើម បានបង្ខំឲ្យមានការលុបចោលថ្នាក់រៀន ក្នុងប៉ុន្មានសប្តាហ៍ថ្មីៗនេះ និងបង្កឲ្យមានការភ័យខ្លាចពីកង្វះទឹក ការដាច់ចរន្តអគ្គិសនី និងការខូចខាតដល់ដំណាំកសិកម្ម។ យ៉ាងហោចណាស់មនុស្ស ៣៤នាក់ បានធ្លាក់ខ្លួនឈឺដោយសារកម្ដៅក្ដៅខ្លាំងនៅហ្វីលីពីន រហូតមកដល់ពេលនេះក្នុងឆ្នាំនេះ ក្នុងនោះមានអ្នកស្លាប់ ៦នាក់។ ក្រសួងសុខាភិបាលបាននិយាយថា ខ្លួនកំពុងពិនិត្យមើលថា តើអ្វីជាមូលហេតុពិតប្រាកដនៃការស្លាប់នោះ។

នៅប្រទេសថៃ សីតុណ្ហភាពបានឡើងដល់កម្រិតខ្ពស់បំផុតជិត ៤៤អង្សាសេ នៅតំបន់មួយចំនួន ភាគខាងជើងនៃប្រទេស ខណៈដែលរដ្ឋធានីបាងកក និងទីប្រជុំជនមួយចំនួនបានជួបសីតុណ្ហភាពឡើងលើសពី ៤០អង្សាសេ។ នាយកដ្ឋានគ្រប់គ្រងជំងឺរបស់ប្រទេសថៃបានប្រាប់ឲ្យដឹងកាលពីសប្តាហ៍មុនថា យ៉ាងហោចណាស់មនុស្ស ៣០នាក់ បានបាត់បង់ជីវិត ដោយសារជំងឺសុរិយរោគ ឬសន្លប់ដោយសារក្ដៅខ្លាំង ក្នុងឆ្នាំនេះ បើធៀបនឹង ៣៧នាក់ សម្រាប់ឆ្នាំមុន។

អ្នកវិទ្យាសាស្ត្របាននិយាយថា ចំនួនអ្នកស្លាប់ទាក់ទងនឹងកម្ដៅ នៅជុំវិញពិភពលោក កំពុងកើនឡើងគួរឲ្យកត់សម្គាល់ក្នុងប៉ុន្មានឆ្នាំចុងក្រោយនេះ រួមជាមួយនឹងសីតុណ្ហភាព ប៉ុន្តែនិន្នាការនៅតំបន់អាស៊ីឆ្នាំនេះមកទល់ពេលនេះ មិនទាន់ច្បាស់លាស់នៅឡើយទេ មួយផ្នែកដោយសារការសង្ស័យអំពីរបៀបចាត់ថ្នាក់នៃការស្លាប់ដែលហាក់ដូចជាទាក់ទងនឹងកម្ដៅ៕