​អូឡាំពិក៖ ​ចិន អូស្ត្រាលី និង​អាមេរិក​បាន​បន្ត​ប្រជែង​មេដាយ​មាស​គ្នា​ លើ​ប្រភេទ​វិញ្ញាសា​កីឡា​ហែលទឹក​នៅ​ព្រឹត្តិការណ៍​អូឡាំពិក​ទីក្រុង​តូ​ក្យូ​។

​​សំរាប់​វិញ្ញាសា​ហែល​មេអំបៅ​ចម្ងាយ ២០០​ម៉ែត្រ​នារី មេដាយ​មាស​បាន​ទៅ​កីឡា​ការិនី​ចិន Zhang Yufei ជាមួយ​នឹង​ថេរវេលា​កំណត់ត្រា​របស់​អូឡាំពិក ២នាទី ៣វិនាទី ៨៦ តាម​ពីក្រោយ​ដោយ​កីឡា​ការិនី​អាមេរិក​ពីរ​នាក់ Regan Smith និង Hali Flickinger ដែល​បាន​មេដាយ​ប្រាក់ និង​សំរឹទ្ធ​។​

​​ចំណែក​ការប្រកួត​ផ្នែក​បុរស​ហែល​បែប​សេរី​ចម្ងាយ ១០០​ម៉ែត្រ កីឡាករ​អាមេរិក Caeleb Dressel ដណ្តើម​បាន​មេដាយ​មាស​អូឡាំពិក​ ជា​លក្ខណៈ​ឯកត្តជន​លើកដំបូង​ក្នុង​អាជីព​។ ​​Caeleb Dressel បាន​យកឈ្នះ​អ្នកការពារ​មេដាយ​មាស​កីឡាករ​អូស្ត្រាលី Kyle Chalmers ខណៈដែល​ថេរវេលា​ដែល​មក​ដល់ទី​ព្រ័ត្រ​របស់ Dressel ក៏បាន​បំបែក​កំណត់ត្រា​អូឡាំពិក​ផងដែរ​។ ​​វិញ្ញាសា​ហែល​បែប​កង្កែប​បុរស​ចម្ងាយ ២០០​ម៉ែត្រ វិញ​លើក​នេះ​មេដាយ​មាស​បាន​មក​កីឡាករ​អូស្ត្រាលី Izaac Stubblety-Cook យកឈ្នះ​កីឡាករ​ហូ​ឡង់ Arno Kamminga ខណៈ​មេដាយសំរឹទ្ធ​បាន​ទៅ​កីឡាករ​ហ្វាំ​ង​ឡង់ Matti Mattsson​។

​​ចុង​ក្រោយនេះ​វិញ្ញាសា​ហែល ៨០០​ម៉ែត្របុរស​បែប​សេរី​វិញ មេដាយមាស​បានមក​កីឡាករ​អាមេរិក Robert Finke ដែលជា​ការបង្ហាញ​ខ្លួន​លើកដំបូង​របស់ខ្លួន​ក្នុង​វិញ្ញាសា​នេះ​។ ​​កីឡាករ​អ៊ីតាលី Gregorio Paltrinieri ទទួលបាន​មេដាយប្រាក់ ខណៈ​មេដាយសំរឹទ្ធ​គឺ​កីឡាករ​អ៊ុយ​ក្រែ​ន Mykhailo Romachuk។ ​​ជ័យជំនះ​របស់ Robert Finke ប្រើ​ថេរវេលា ៧នាទី ៤១វិនាទី ៨៧ មកដល់​ទី​មុន​អ្នក​លេខ២ តែ ០​វិនាទី ២៤ ប៉ុណ្ណោះ​៕

​អត្ថបទ​៖​នាង សុភា​វុ​ធ