មូលនិធិរូបិយវត្ថុអន្តរជាតិ (IMF) បានឲ្យដឹងនៅក្នុងសេចក្តីថ្លែងការណ៍ថា ទីភ្នាក់ងារនេះបានអនុម័តថវិកាចំនួន ១,១ពាន់លានដុល្លារ សម្រាប់ប្រទេសប៉ាគីស្ថាន កាលពីថ្ងៃចន្ទ (ទី២៩ ខែមេសា) ចំពេលមានការពិភាក្សាអំពីប្រាក់កម្ចីថ្មី។

ការផ្តល់មូលនិធិនេះ គឺជាជំនួយទី២ និងចុងក្រោយនៃការរៀបចំមូលនិធិបម្រុងទុកចំនួន ៣ពាន់លានដុល្លារជាមួយ IMF ដែលទីក្រុងអ៊ីស្លាម៉ាបាដ ទទួលបានកាលពីរដូវក្តៅមុន ដើម្បីជួយបញ្ចៀសការខកខានសងបំណុលអធិបតេយ្យភាព។

គួរបញ្ជាក់ថា ការអនុម័តនេះបានកើតឡើង មួយថ្ងៃបន្ទាប់ពីនាយករដ្ឋមន្ត្រីប៉ាគីស្ថាន លោក Shehbaz Sharif បានពិភាក្សាអំពីកម្មវិធីកម្ចីថ្មីជាមួយនាយកគ្រប់គ្រង IMF លោកស្រី Kristalina Georgieva នៅខាងក្រៅវេទិកាសេដ្ឋកិច្ចពិភពលោក (WEF) នៅទីក្រុងរីយ៉ាដ ប្រទេសអារ៉ាប៊ីសាអ៊ូឌីត។

ទីក្រុងអ៊ីស្លាម៉ាបាដកំពុងស្វែងរកកិច្ចព្រមព្រៀងផ្តល់មូលនិធិបន្ថែមរយៈពេលវែង (EFF) ថ្មី និងធំជាងមុន ជាមួយស្ថាប័នផ្ដល់ប្រាក់កម្ចីសកលមួយនេះ បន្ទាប់ពីមូលនិធីបម្រុងទុកបច្ចុប្បន្ន ត្រូវផុតកំណត់ក្នុងខែនេះ៕