អ្នកនាំពាក្យអង្គការសហប្រជាជាតិ បាននិយាយកាលពីថ្ងៃចន្ទថា ស្ថាប័នពិភពលោកមួ ប្រឆាំងទៅនឹងការបង់ពន្ធលើការដឹកជញ្ជូនជំនួយ និងប្រតិបត្តិការរក្សាសន្តិភាព ដែលត្រូវបានដាក់ដោយប្រទេសស៊ូដង់ខាងត្បូង។

លោក Stephane Dujarric ប្រធានអ្នកនាំពាក្យរបស់អគ្គលេខាធិការអង្គការសហប្រជាជាតិ បាននិយាយថា ជាក់ស្តែង ការធ្វើបែបនេះផ្ទុយនឹងកិច្ចព្រមព្រៀងដែលយើងមានជាមួយអាជ្ញាធរស៊ូដង់ខាងត្បូង។ លោកនិយាយថា ទោះបីជាមានការជំទាស់ពីអង្គការសហប្រជាជាតិក៏ដោយ ក៏ការបង់ពន្ធនៅតែមាន។ អ្នកសម្របសម្រួលផ្នែកមនុស្សធម៌របស់អង្គការសហប្រជាជាតិ លោកស្រី អានីតា គីគី បេហូ (Anita Kiki Gbeho) បានព្រមានថា ការបង់ពន្ធ និងការឲ្យបង់ប្រាក់ថ្មី ដែលត្រូវបានដាក់ចាប់តាំងពីខែកុម្ភៈ នឹងបន្ថែមប្រាក់ចំនួន ៣៣៩.០០០ដុល្លារអាមេរិកក្នុងមួយខែចំពោះតម្លៃជំនួយស្បៀងអាហារ និងប្រតិបត្តិការនៃសេវាមនុស្សធម៌របស់អង្គការសហប្រជាជាតិ។ លោក Dujarric និយាយថា មូលនិធិនេះនឹងផ្តល់ស្បៀងអាហារដល់មនុស្សជាង ១៦.៣០០នាក់ សម្រាប់រយៈពេលមួយខែ។

មនុស្សជាង ៦០.០០០នាក់ បានទទួលរងផលប៉ះពាល់រួចហើយ បន្ទាប់ពីអង្គការសហប្រជាជាតិ ត្រូវបានបង្ខំឱ្យផ្អាកការទម្លាក់ជំនួយស្បៀងអាហារសង្គ្រោះជីវិតពីយន្តហោះ ហើយចំនួននេះនឹងកើនឡើងដល់ ១៤៥.០០០នាក់ នៅចុងខែឧសភា ប្រសិនបើវិធានការបែបនេះនៅតែមាន។

ការបង់ពន្ធ កំពុងធ្វើឲ្យប៉ះពាល់ដល់បេសកកម្មរក្សាសន្តិភាពរបស់អង្គការសហប្រជាជាតិនៅប្រទេសស៊ូដង់ខាងត្បូង។ លោក Dujarric និយាយថា កងរក្សាសន្តិភាព កំពុងពិនិត្យមើលឡើងវិញ ផលប៉ះពាល់នៃការបង់ពន្ធលើរាល់សកម្មភាពរបស់ពួកគេ រួមទាំងការល្បាត ការសាងសង់ប៉ុស្តិ៍នគរបាល សាលារៀន មណ្ឌលថែទាំសុខភាព និងការគាំទ្រផ្នែកអប់រំ។

លោកនិយាយថា បេសកកម្មរក្សាសន្តិភាពរបស់អង្គការសហប្រជាជាតិ បានដាក់ពង្រាយកងកម្លាំងបន្ថែម និងបានបើកការល្បាតរួមគ្នាបន្ទាន់ទៅកាន់ចំណុចក្តៅពីរកន្លែង បន្ទាប់ពីមានការកើនឡើងភ្លាមៗនៃអំពើហិង្សាអន្តរសហគមន៍។