ក្រុមឧទ្ទាម Houthis របស់ប្រទេសយេម៉ែន បាននិយាយថា ពួកគេបានកំណត់គោលដៅលើនាវាកុងតឺន័រ MSC Orion ក្នុងការវាយប្រហារដោយយានដ្រូន នៅមហាសមុទ្រឥណ្ឌា ជាផ្នែកមួយនៃយុទ្ធនាការដែលកំពុងបន្តមានរបស់ពួកគេប្រឆាំងនឹងការដឹកជញ្ជូនអន្តរជាតិ ដើម្បីបង្ហាញសាមគ្គីភាពជាមួយប៉ាឡេស្ទីនប្រឆាំងនឹងសកម្មភាពយោធារបស់អ៊ីស្រាអែលនៅតំបន់ហ្កាហ្សា។

យោងតាមទិន្នន័យរបស់ LSEG បានឲ្យដឹងថា នាវា MSC Orion ដែលមានទង់ជាតិប្រទេសព័រទុយហ្គាល់ កំពុងធ្វើដំណើររវាងកំពង់ផែជាច្រើន ក្នុងទីក្រុង Sines របស់ព័រទុយហ្គាល់ និងទីក្រុង Salalah ប្រទេសអូម៉ង់ ហើយម្ចាស់ដែលបានចុះបញ្ជីរបស់នាវានេះ គឺក្រុមហ៊ុន Zodiac Maritime។ ក្រុមហ៊ុន Zodiac ត្រូវបានគ្រប់គ្រងដោយអ្នកជំនួញជនជាតិអ៊ីស្រាអែលឈ្មោះ Eyal Ofer ហើយក្រុមហ៊ុននេះមិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។

គួរបញ្ជាក់ថា ក្រុមសកម្មប្រយុទ្ធហ៊ួទី ដែលមានសម្ព័ន្ធមិត្តជាមួយអ៊ីរ៉ង់ បានបើកការវាយប្រហារដោយយានដ្រូន និងមីស៊ីលម្តងហើយម្តងទៀត នៅសមុទ្រក្រហម ច្រកសមុទ្រ Bab al-Mandab និងឈូងសមុទ្រ Aden ចាប់តាំងពីខែវិច្ឆិកាមក ដោយបង្ខំឲ្យនាវាដឹកជញ្ជូនទំនិញប្ដូរផ្លូវធ្វើដំណើរដែលមានចម្ងាយឆ្ងាយ និងចំណាយថ្លៃជាងមុន នៅជុំវិញអាហ្វ្រិកខាងត្បូង ហើយបង្កឲ្យមានការភ័យខ្លាចថា សង្គ្រាមអ៊ីស្រាអែល-ហាម៉ាស អាចរីករាលដាល និងមានអស្ថិរភាព នៅតំបន់មជ្ឈិមបូព៌ា៕