បង់ក្លាដែស៖ ភ្លៀងធ្លាក់ខ្លាំងច្រើនថ្ងៃជាប់គ្នា បានបង្កការលិចលង់ជំរំជនភៀសខ្លួនរ៉ូហ៊ីងយ៉ា នៅភាគខាងត្បូងប្រទេសបង់ក្លាដែសដោយបានបំផ្លាញទីជម្រក និងបញ្ជូនមនុស្សរាប់ពាន់នាក់ទៅស្នាក់នៅរួមគ្នា ដែលមានសមាជិកគ្រួសារជាច្រើន ឬនៅក្នុងជម្រកសហគមន៍។
ទីភ្នាក់ងារជនភៀសខ្លួនអង្គការសហប្រជាជាតិបាននិយាយថា ក្នុងរយៈពេល ២៤ម៉ោងរហូតដល់រសៀលថ្ងៃពុធទឹកភ្លៀងជាង ៣០សង់ទីម៉ែត្របានធ្លាក់ទៅលើជំរំនានាក្នុងស្រុក Cox's Bazar ដែលមានជនភៀសខ្លួនរ៉ូហ៊ីងយ៉ាជាង ៨០០.០០០នាក់កំពុងរស់នៅ។ នោះគឺជិតពាក់កណ្ដាលនៃទឹកភ្លៀងខែកក្កដាជាមធ្យមក្នុងរយៈពេល ១ថ្ងៃហើយមានភ្លៀងធ្លាក់ច្រើនត្រូវបានគេរំពឹងថា នឹងកើតឡើងនៅប៉ុន្មានថ្ងៃខាងមុខ ហើយរដូវមូសុងនឹងបន្តអូសបន្លាយក្នុងរយៈពេល ៣ខែទៀត។
ទីភ្នាក់ងារនេះបាននិយាយថា ស្ថានភាពនឹងកាន់តែធ្ងន់ធ្ងរថែមទៀត ដែលបង្កឡើងដោយវីរុសរាតត្បាតសកល COVID-19។ បច្ចុប្បន្នមានការរឹតត្បិតយ៉ាងតឹងរ៉ឹងទូទាំងប្រទេស ជាការឆ្លើយតបទៅនឹងករណីឆ្លងដែលកំពុងហក់ឡើងខ្ពស់នៅទូទាំងប្រទេស។ ទីភ្នាក់ងារនេះនិយាយថា មនុស្ស ៦នាក់បានស្លាប់នៅក្នុងជំរំកាលពីដើមសប្ដាហ៍នេះ ក្នុងនោះមនុស្ស ៥នាក់បានស្លាប់ដោយសារការបំណាក់ដី ដែលបណ្តាលមកពីភ្លៀងធ្លាក់ខ្លាំង និងក្មេងម្នាក់បានហូរកួចតាមទឹកជំនន់៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
