រុស្ស៊ីបាននិយាយនៅថ្ងៃអង្គារនេះថា សហរដ្ឋអាមេរិក កំពុងមានពុតត្បុតដោយប្រឆាំងនឹងការស៊ើបអង្កេតរបស់តុលាការឧក្រិដ្ឋកម្មអន្តរជាតិ (ICC) លើប្រទេសអ៊ីស្រាអែល ប៉ុន្តែគាំទ្រដល់ដីការបស់តុលាការសម្រាប់ការចាប់ខ្លួនលោកប្រធានាធិបតី វ្ល៉ាឌីមៀ ពូទីន។

តុលាការ ICC ដែលអាចចោទប្រកាន់បុគ្គលទាំងឡាយពីឧក្រិដ្ឋកម្មសង្គ្រាម ឧក្រិដ្ឋកម្មប្រឆាំងមនុស្សជាតិ និងអំពើប្រល័យពូជសាសន៍ កំពុងស៊ើបអង្កេតការវាយប្រហារឆ្លងព្រំដែនកាលពីថ្ងៃទី៧ ខែតុលារបស់ក្រុមហាម៉ាស និងការវាយលុកដោយយោធាដ៏សាហាវរបស់អ៊ីស្រាអែលទៅលើតំបន់ហ្កាហ្សាដែលគ្រប់គ្រងដោយក្រុមហាម៉ាស ឥឡូវនេះ ស្ថិតនៅក្នុងខែទី៧ របស់ខ្លួន។

អ្នកនាំពាក្យសេតវិមាន លោក Karine Jean-Pierre បាននិយាយកាលពីថ្ងៃចន្ទថា សហរដ្ឋអាមេរិកមិនគាំទ្រការស៊ើបអង្កេតរបស់តុលាការ ICC លើអ៊ីស្រាអែលទេ ហើយមិនជឿថា តុលាការនេះ មានយុត្តាធិការនោះទេ។

ប្រធានាធិបតីសហរដ្ឋអាមេរិក លោក ចូ បៃដិន (Joe Biden) បាននិយាយកាលពីឆ្នាំមុនថា ការសម្រេចចិត្តរបស់តុលាការ ICC ក្នុងការចេញដីកាចាប់ខ្លួនលោក ពូទីន គឺត្រឹមត្រូវហើយ។ សហរដ្ឋអាមេរិក បានចែករំលែកព័ត៌មានលម្អិតអំពីឧក្រិដ្ឋកម្មសង្គ្រាមរុស្ស៊ីនៅអ៊ុយក្រែនជាមួយ ICC។

រុស្ស៊ីនិយាយថា ដីកាប្រឆាំងលោក ពូទីន គឺជាការប៉ុនប៉ងគ្មានន័យរបស់ប្រទេសលោកខាងលិច ដើម្បីធ្វើឲ្យខូចកេរ្តិ៍ឈ្មោះរបស់រុស្ស៊ី និងបដិសេធឧក្រិដ្ឋកម្មសង្រ្គាមនៅអ៊ុយក្រែន។ អ៊ុយក្រែនថា រុស្ស៊ីបានប្រព្រឹត្តឧក្រិដ្ឋកម្មសង្រ្គាម។ រុស្ស៊ីនិយាយថា លោកខាងលិច មិនបានអើពើនឹងឧក្រិដ្ឋកម្មរបស់អ៊ុយក្រែនដែលជាការចោទប្រកាន់មួយដែលត្រូវបានបដិសេធដោយទីក្រុងគីវនោះ។