អ្នកនាំពាក្យរដ្ឋាភិបាលអាហ្វហ្គានីស្ថាន នៅថ្ងៃអង្គារ (ទី៣០ ខែមេសា) បានឲ្យដឹងថា ខ្មាន់កាំភ្លើងម្នាក់បានបាញ់ប្រហារទៅលើវិហារឥស្លាមមួយ នៅភាគខាងលិចប្រទេស ហើយបានសម្លាប់មនុស្សយ៉ាងហោចណាស់ ៦នាក់។

អ្នកនាំពាក្យក្រសួងមហាផ្ទៃលោក Abdul Mateen Qani បាននិយាយថា កាលថ្ងៃចន្ទ (ទី២៩ ខែមេសា) នៅម៉ោងប្រហែល ៩យប់ «ជនមិនស្គាល់មុខម្នាក់ បានបាញ់ប្រហារទៅលើអ្នកគោរពបូជាជនស៊ីវិល នៅក្នុងវិហារឥស្លាមមួយ» នៅតំបន់ Guzara ក្នុងខេត្ត Herat។ អ្នកនាំពាក្យរូបនេះបានសរសេរនៅលើវេទិកាបណ្ដាញសង្គម X នៅព្រឹកព្រលឹមថ្ងៃទី៣០ ខែមេសានេះថា៖ «ជនស៊ីវិល ៦នាក់ ត្រូវបានសម្លាប់ ហើយជនស៊ីវិលម្នាក់ទៀត បានរងរបួស»។

ទីភ្នាក់ងារព័ត៌មានរដ្ឋ Bakhtar ផ្តល់នូវតួលេខអ្នកស្លាប់ក្នុងចំនួនដូចគ្នាពីការវាយប្រហារដែលបានកើតឡើងនៅក្នុងតំបន់មួយនៅភាគខាងត្បូងទីរួមខេត្ត Herat។ ដោយស្រង់ប្រភពនានា បណ្តាញសារព័ត៌មានក្នុងស្រុក Tolo បានរាយការណ៍ថា វិហារឥស្លាមជារបស់សហគមន៍ជនជាតិភាគតិច Shi’ite (ស៊ីអ៊ីត) ក្នុងប្រទេសអាហ្វហ្គានីស្ថាន។

ទោះបីជាមិនទាន់មានក្រុមណាមួយចេញមុខអះអាងទទួលខុសត្រូវ ចំពោះការវាយប្រហារនេះក៏ដោយ ក៏សម្ព័ន្ធប្រចាំតំបន់របស់ក្រុមភេរវករ ISIS គឺជាក្រុមដែលត្រូវបានចាត់ទុកថា ជាការគំរាមកំហែងផ្នែកសន្តិសុខដ៏ធំបំផុតនៅក្នុងប្រទេសអាហ្វហ្គានីស្ថាន ដោយក្រុមនេះតែងតែបានកំណត់គោលដៅជាញឹកញាប់លើសហគមន៍ស៊ីអ៊ីត។

រដ្ឋាភិបាលតាលីបង់បានសន្យាការពារក្រុមអ្នកកាន់សាសនាតូចៗ និងជនជាតិភាគតិច ចាប់តាំងពីការវិលត្រឡប់មកកាន់អំណាចវិញ ក្នុងខែសីហា ឆ្នាំ២០២១ ប៉ុន្តែអ្នកឃ្លាំមើលសិទ្ធិមនុស្ស បានលើកឡើងថា ការសន្យានោះសម្រេចបានតិចតួចណាស់៕