ហាងចំនួនជាង ១០០ របស់ក្រុមហ៊ុនអាហាររហ័ស Kentucky Fried Chicken (KFC) នៅក្នុងប្រទេសម៉ាឡេស៊ី ត្រូវបាន «បិទជាបណ្ដោះអាសន្ន» ដោយការធ្វើបែបនេះ កើតមានឡើងចំពេលមានការធ្វើពហិការសេដ្ឋកិច្ចជាច្រើនខែ ដែលភ្ជាប់ទៅនឹងជម្លោះ នៅតំបន់ហ្កាហ្សា។

សារព័ត៌មានភាសាចិន Nanyang Siau Pau នៅម៉ាឡេស៊ី បានរាយការណ៍ថា ហាងចំនួន ១០៨ របស់យីហោអាមេរិកមួយនេះ បានបញ្ឈប់ប្រតិបត្តិការរបស់ខ្លួន។ រដ្ឋ Kelantan គឺជារដ្ឋដែលរងគ្រោះខ្លាំងជាងគេ ដោយហាងជិត ៨០ភាគរយ ឬមានចំនួនរហូតដល់ទៅ ២១ហាង បានរងផលប៉ះពាល់។

ពាក់ព័ន្ធនឹងករណីនេះ ក្រុមហ៊ុន QSR Brands ដែលជាម្ចាស់ និងប្រតិបត្តិការហាង KFC នៅទូទាំងម៉ាឡេស៊ី សិង្ហបុរី ប្រ៊ុយណេ និងកម្ពុជា បានឲ្យដឹងថា ដើម្បីឆ្លើយតបទៅនឹងស្ថានភាពសេដ្ឋកិច្ចដ៏លំបាក ខ្លួនបានចាត់វិធានការជាក់ស្ដែង ដោយបិទហាងជាបណ្ដោះអាសន្ន ដែលជាមធ្យោបាយគ្រប់គ្រងការឡើងថ្លៃដើមអាជីវកម្ម និងផ្តោតលើតំបន់ពាណិជ្ជកម្មដែលមានការប្រឈមខ្ពស់។

នៅក្នុងសេចក្តីថ្លែងការណ៍មួយ កាលពីថ្ងៃចន្ទ (ទី២៩ ខែមេសា) ក្រុមហ៊ុនបាននិយាយថា បុគ្គលិកមកពីហាងដែលរងផលប៉ះពាល់ ត្រូវបានផ្តល់ឱកាសឲ្យផ្លាស់ទៅកាន់ហាងប្រតិបត្តិការ ដែលមានភាពមមាញឹក ជាផ្នែកនៃកិច្ចខិតខំប្រឹងប្រែងបង្កើនប្រសិទ្ធភាពឡើងវិញរបស់ក្រុមហ៊ុន។

ក្រុមហ៊ុនបានប្រាប់ថា៖ «ក្នុងនាមជាក្រុមហ៊ុនដែលបានបម្រើប្រជាជនម៉ាឡេស៊ីអស់រយៈពេលជាង ៥០ឆ្នាំមកហើយនោះ ការផ្តោតសំខាន់ នៅតែជាការផ្តល់នូវផលិតផល និងសេវាកម្មប្រកបដោយគុណភាពដល់អតិថិជន ខណៈពេលដែលរួមចំណែកជាវិជ្ជមានដល់សេដ្ឋកិច្ចម៉ាឡេស៊ី តាមរយៈការផ្ដល់សុវត្ថិភាពការងាដល់សមាជិកក្រុមចំនួន ១៨.០០០នាក់ នៅក្នុងប្រទេសម៉ាឡេស៊ី ដែលក្នុងនោះមានប្រមាណ ៨៥ភាគរយជាជនមូស្លីម»។

តែទោះជាយ៉ាងក្ដី ពួកគេមិនបានបង្ហាញពីចំនួនហាង ឬកម្មករដែលរងផលប៉ះពាល់នោះឡើយ៕