​វាយ​កូន​បាល់៖ ​កីឡាករ​វាយ​កូន​បាល់​លេខ ១ ពិភពលោក Novak Djokovic បានបញ្ចប់​ក្តីសង្ឃឹម​កីឡាករ​ម្ចាស់ផ្ទះ​ជប៉ុន Kei Nishikori ដែល​ចង់​ឈ្នះ​មេដាយមាស​អូឡាំពិក​លើទឹក​ដី​ខ្លួនឯង​។

​​Djokovic បាន​បន្តដំណើរ​ចង់​ក្លាយជា​កីឡាករ​វាយ​កូន​បាល់​ដំបូង​ដែល​ឈ្នះ​ជើងឯក Grand Slam ទាំង​បួន និង​ឈ្នះ​មេដាយមាស​អូឡាំពិក​ក្នុង​ឆ្នាំ​តែមួយ ​ក្រោយ​យកឈ្នះ Kei Nishikori លទ្ធផល ២សិត​ផ្ទួន ៦-២ និង ៦-០​។ ​​ជ័យជំនះ​នេះ​ធ្វើឱ្យ Djokovic ឡើង​វគ្គ​ពាក់កណ្តាល​ផ្ដាច់ព្រ័ត្រ​ដោយ​នឹង​ត្រូវ​ជួប​ជាមួយ​កីឡាករ​អាល្លឺម៉ង់ Alexander Zverev ដែល​បាន​យកឈ្នះ​កីឡាករ​បារាំង Jeremy Chardy ៦-៤ និង ៦-១​។ ​​ទោះជា​ជោគជ័យ​លើ​កីឡា​វាយ​កូន​បាល់​យ៉ាងណាក្តី Novak Djokovic មិន​ដែល​មាន​ប្រវត្តិ​ឡើង​វគ្គ​ផ្ដាច់ព្រ័ត្រ​នៅ​ព្រឹត្តិការណ៍​អូឡាំពិក​រដូវ​ក្តៅ​ឡើយ ដោយ​ស្ថិតិ​ល្អ​បំផុត​នោះ​គឺ​បាន​ត្រឹម​មេដាយ​សំរឹទ្ធ ​អូឡាំពិក​ទីក្រុង​ប៉េកាំង​ប្រទេស​ចិន​ឆ្នាំ២០០៨ ក្រោយ​ចាញ់ Rafael Nadal នៅ​វគ្គ​ពាក់កណ្តាល​ផ្តាច់ព្រ័ត្រ​។​

​​ងាក​មក​ការប្រកួត​ផ្នែក​នារី​វិញ កីឡាការិនី​ស្វ៊ី​ស Belinda Bencic បាន​កក់​កៅអី​នៅ​វគ្គ​ផ្ដាច់​ព្រ័ត្រ​ដណ្តើម​មេដាយមាស​ហើយ ​ក្រោយ​ជ័យជំនះ​លើ​កីឡាការិនី​កា​ហ្សា​ក់​ស្ថាន Elena Rybakina លទ្ធផល​តានតឹង ២សិត​ទល់នឹង ១ ពិន្ទុ ៧-៦(៧-២), ៤-៦ និង ៦-៣។ កីឡា​ការិនី​​ស្វ៊ី​សរូប​នេះ​នឹងត្រូវ​ជួប​ជាមួយ​កីឡាការិនី​ឆេ​ក Marketa Vondrousova នៅ​វគ្គ​ផ្តាច់ព្រ័ត្រ​ដណ្តើម​មេដាយមាស​។ ​Marketa Vondrousova ដែល​ទំលាក់ Naomi Osaka នោះបាន​យកឈ្នះ​កីឡាការិនី​អ៊ុយ​ក្រែ​ន Elina Svitolina លទ្ធផល ៦-៣ និង ៦-១៕

​អត្ថបទ​៖​នាង សុភា​វុ​ធ