ស្ត្រីជនជាតិអ៊ុយក្រែនវ័យ ៩៨ឆ្នាំម្នាក់ បានប្រាប់ថា គាត់បានដើរចម្ងាយ ១០គីឡូម៉ែត្រ នៅក្រោមការបាញ់ផ្លោង ដោយទប់ខ្លួនជាមួយឈើច្រត់ និងសម្រាកផ្ទាល់ដី ដើម្បីភៀសខ្លួនចេញពីទីក្រុង Ocheretyne ក្នុងតំបន់ Donetsk ដែលឥឡូវនេះត្រូវបានរុស្ស៊ីកាន់កាប់ ហើយព្យាយាមដើរឲ្យដល់តំបន់ដែលស្ថិតក្រោមការគ្រប់គ្រងរបស់ទីក្រុងគីវ។

នៅក្នុងវីដេអូដែលត្រូវបានបង្ហោះដោយនគរនបាលរបស់ប្រទេសអ៊ុយក្រែន នៅលើបណ្ដាញសង្គម កាលពីថ្ងៃចន្ទ (២៩ មេសា) ស្ត្រីវ័យចំណាស់ដែលត្រូវបានស្គាល់ថា Lidia Stepanivna បាននិយាយថា លោកយាយបានដើរដោយគ្មានអាហារ ឬទឹកបរិភោគ ហើយបានដួលជាច្រើនដង។

នៅក្នុងវីដេអូដែលបង្ហាញពីលោកយាយអង្គុយនៅលើគ្រែក្នុងទីជម្រកបណ្ដោះអាសន្ន លោកយាយ Stepanivna បាននិយាយថា៖ «ខ្ញុំមិនស្លាប់ក្នុងសង្រ្គាមនោះ (សង្គ្រាមលោកលើកទី២) ហើយខ្ញុំកំពុងរួចជីវិតពីសង្រ្គាមនេះ»។ 

តាមរយៈសេចក្តីថ្លែងការណ៍មួយនៅលើគេហទំព័ររបស់ខ្លួន ក្រសួងមហាផ្ទៃអ៊ុយក្រែន បានឲ្យដឹងថា ស្ត្រីនោះត្រូវបានរកឃើញដោយយោធាអ៊ុយក្រែន នាពេលល្ងាច ហើយបានប្រគល់ទៅឲ្យនគរបាល ដែលបាននាំលោកយាយទៅជម្រកសម្រាប់ជនភៀសខ្លួន។

គួរបញ្ជាក់ថា សង្រ្គាមដែលឥឡូវនេះ ស្ថិតក្នុងឆ្នាំទី៣ និងដែលគ្មានសញ្ញាឈានដល់ទីបញ្ចប់នោះ បានសម្លាប់មនុស្សរាប់ពាន់នាក់ ហើយប្រែក្លាយទីក្រុង និងភូមិរបស់អ៊ុយក្រែនទៅជាគំនរបាក់បែក ព្រមទាំងធ្វើឲ្យប្រជាជនរាប់លាននាក់ភៀសខ្លួនចេញពីលំនៅឋាន៕