កំណើនសេដ្ឋកិច្ចឆ្នាំនេះ នៅក្នុងតំបន់អាស៊ី-ប៉ាស៊ីហ្វិក នឹងមានកម្រិតត្រឹម ៤,៥ភាគរយ ពោលគឺទាបជាងកម្រិត ៥ភាគរយ ក្នុងឆ្នាំ២០២៣។ នេះបើតាមការលើកឡើងពីមូលនិធិរូបិយវត្ថុអន្តរជាតិ (IMF) នៅក្នុងរបាយការណ៍ ស្ដីពី «ទស្សនវិស័យសេដ្ឋកិច្ចក្នុងតំបន់អាស៊ី និងប៉ាស៊ីហ្វិក» ដែលត្រូវបានចេញផ្សាយនៅសិង្ហបុរី នាថ្ងៃអង្គារ (ទី៣០ ខែមេសា) នេះ។

របាយការណ៍បានកត់សម្គាល់ថា អាស៊ី-ប៉ាស៊ីហ្វិកត្រូវបានគេរំពឹងថា នឹងនៅតែជាតំបន់ ដែលមានថាមពលខ្លាំងបំផុត ក្នុងពិភពលោក ដោយរួមចំណែកប្រហែល ៦០ភាគរយនៃកំណើនពិភពលោក នៅឆ្នាំ២០២៤។ ហើយ IMF បានប្រាប់ថា តំបន់នេះទទួលបានផលចំណេញពីកត្តាជំរុញកំណើនចម្រុះច្រើនយ៉ាង រាប់ចាប់ពីការប្រើប្រាស់ក្នុងស្រុកដែលមានភាពធន់នៅក្នុងបណ្តាប្រទេសអាស៊ានភាគច្រើន រហូតដល់ការកើនឡើងតិចតួចនៃវិស័យទេសចរណ៍ ក្នុងល្បឿនដ៏លឿន នៅក្នុងបណ្តាប្រទេសកោះប៉ាស៊ីហ្វិក។

តែយ់ាងណាក្ដី ហានិភ័យ ក្នុងពេលអនាគតដ៏ខ្លី គឺស្ថិតក្នុងភាពមិនច្បាស់លាស់កាន់តែខ្លាំងឡើង។ IMF បានលើកឡើងថា ការធ្លាក់ចុះអតិផរណា និងការរំពឹងទុកពីការបន្ធូរបន្ថយរូបិយវត្ថុពីដំបូង បានធ្វើឲ្យលទ្ធភាពនៃការធ្លាក់ចុះកំណើនមានកាន់តែខ្ពស់។

ជាមួយគ្នានេះ របាយការណ៍របស់ស្ថាប័នផ្ដល់ប្រាក់កម្ចីសកលមួយនេះ បានបន្ថែមថា កំណើនខ្លាំងជាងការរំពឹងទុក នៅតំបន់អឺរ៉ុប និងសហរដ្ឋអាមេរិក នឹងនាំឲ្យមានកំណើនដល់អ្នកនាំចេញរបស់អាស៊ី ខណៈពេលដែលការកើនឡើងនូវការបែងចែកភូមិសាស្ត្រសេដ្ឋកិច្ច និងភាពតានតឹងភូមិសាស្ត្រនយោបាយ បន្តបង្កឲ្យមានហានិភ័យពីការធ្លាក់ចុះយ៉ាងធ្ងន់ធ្ងរ ចំពោះកំណើនរយៈពេលមធ្យមនៅក្នុងតំបន់៕