នគរបាល Metropolitan បានប្រាប់ឲ្យដឹងថា ក្មេងប្រុសអាយុ ១៣ឆ្នាំម្នាក់ ត្រូវបានសម្លាប់ និងមនុស្ស ៤នាក់ផ្សេងទៀត បានរងរបួស បន្ទាប់ពីមានហេតុការណ៍ចាក់ នៅទីក្រុងឡុងដ្រ៍របស់ប្រទេសអង់គ្លេស នៅថ្ងៃអង្គារ (ទី៣០ ខែមេសា) ដោយពាក់ព័ន្ធនឹងបុរសម្នាក់ដែលមានកាន់ដាវក្នុងដៃ។

ស្នងការនគរបាលក្រុងឡុងដ៍ លោក Stuart Bell បាននិយាយថា៖ «ពិតជាសោកស្ដាយខ្លាំងណាស់ ដែលខ្ញុំត្រូវបញ្ជាក់ថា ក្នុងចំណោមអ្នករងរបួស ក្មេងប្រុសអាយុ ១៣ឆ្នាំម្នាក់បានស្លាប់។ រូបគេត្រូវបានបញ្ជូនទៅមន្ទីរពេទ្យ បន្ទាប់ពីត្រូវបានចាក់ ហើយគួរឲ្យសោកសៅណាស់ ក្មេងនោះបានស្លាប់នៅបន្តិចក្រោយមក»។

នគរបាលបានដេញតាម និងចាប់ខ្លួនបុរសវ័យ ៣៦ឆ្នាំម្នាក់ បន្ទាប់ពីមានកើតហេតុការណ៍នៅជិតតំបន់ Hainault ភាគខាងកើតទីក្រុងឡុងដ្រ៏។ ខ្សែវីដេអូបង្ហាញពីបុរសម្នាក់ពាក់អាវពណ៌លឿង ហើយមានកាន់ដាវ។

បុគ្គលិកសាធារណៈ ២នាក់ និងមន្ត្រីនគរបាល ២នាក់ កំពុងសម្រាកនៅមន្ទីរពេទ្យ ដើម្បីព្យាបាលរបួសដែលមិនគំរាមកំហែងជីវិត។ ហើយលោក Bell បានបន្ថែមថា មន្ត្រីនគរបាលទាំង ២នាក់ មានរបួសដោយសារការចាក់នោះដែលតម្រូវឲ្យវះកាត់។ ជាមួយគ្នានេះ នគរបាលបាននិយាយថា ពួកគេមិនជឿថាឧបទ្ទវហេតុនេះទាក់ទងនឹងអំពើភេរវកម្មនោះឡើយ៕