ហ្វីលីពីន នៅថ្ងៃពុធ (០១ ឧសភា) នេះបានចោទប្រកាន់ឆ្មាំល្បាតឆ្នេររបស់ចិន ពីការបង្កើនភាពតានតឹងនៅក្នុងសមុទ្រចិនខាងត្បូង បន្ទាប់ពីបានប្រើប្រាស់កាណុងបាញ់ទឹក ដែលបានបង្កការខូចខាតដល់នាវាពីរគ្រឿងរបស់ហ្វីលីពីន។

ក្រុមមន្ត្រីហ្វីលីពីនបាននិយាយថា នាវាឆ្មាំល្បាតឆ្នេរមួយគ្រឿង និងកប៉ាល់នេសាទមួយគ្រឿងបានរងការខូចខាតកាលពីថ្ងៃអង្គារ ដោយសារកាណុងបាញ់ទឹកដែលឆ្មាំល្បាតឆ្នេរចិន ក្នុងពេលដែលកំពុងធ្វើដំណើរទៅកាន់ថ្មប៉ប្រះទឹក ស្កាបូរ៉ូ ស្ហូល (Scarborough Shoal) ដើម្បីជួយអ្នកនេសាទហ្វីលីពីននៅក្នុងតំបន់នោះ។

អ្នកនាំពាក្យឆ្មាំល្បាតឆ្នេរហ្វីលីពីន លោក ជេយ តារៀលឡា (Jay Tarriela) និយាយថា «ឆ្មាំល្បាតឆ្នេរចិនឥឡូវនេះបានបង្កើនភាពតានតឹង និងកម្រិតនៃការខឹងសម្បាររបស់ពួកគេផងដែរ ឆ្ពោះទៅរកនាវាឆ្មាំល្បាតឆ្នេរហ្វីលីពីន»។

លោក តារៀលឡា បន្ថែមថា ខណៈពេលដែលការប្រើប្រាស់កាណុងបាញ់ទឹករបស់ចិនមិនទាន់ជាការវាយប្រហារដោយប្រដាប់អាវុធនៅឡើយទៅលើនាវា និងបុគ្គលិករបស់ខ្លួន ប្រទេសចិនបាននិងកំពុងបង្កើនសម្ពាធទឹកនៅពេលកំណត់គោលដៅលើនាវាហ្វីលីពីន។

ពុំមានប្រទេសណាមានអធិបតេយ្យភាពលើតំបន់ ស្កាបូរ៉ូ ស្ហូល ដែលជាកន្លែងនេសាទដ៏សំខាន់ប្រើប្រាស់ដោយប្រទេសមួយចំនួននៅជិតផ្លូវដឹកជញ្ជូនធំៗនេះទេ។ ថ្មប៉ប្រះទឹកនេះ ស្ថិតនៅក្នុងតំបន់សេដ្ឋកិច្ចផ្តាច់មុខរបស់ប្រទេសហ្វីលីពីន ហើយបានក្លាយជាកន្លែងនៃការប្រឈមមុខគ្នាជាច្រើនរវាងចិន និងហ្វីលីពីន ក្នុងប៉ុន្មានឆ្នាំថ្មីៗនេះ៕