មន្ត្រីសុខាភិបាលរាជធានីភ្នំពេញ បានចុះអប់រំស្រាវជ្រាវជំងឺមិនឆ្លង​ក្នុងចំណោម​ប្រជាជន​គោលដៅ​ដែ​លមានអាយុចាប់ពី៤០ឆ្នាំឡើងទៅ នៅមូលដ្ឋានសង្កាត់ជ្រោយចង្វារ ខណ្ឌជ្រោយ​ចង្វារ រាជធានីភ្នំពេញ។

លោកស្រី គុយ ចាន់ស្រីណាក់ ប្រធានមណ្ឌលសុខភាពជ្រោយចង្វារ ថ្លែងប្រាប់BTV ព័ត៌មាន នា​ព្រឹកថ្ងៃទី១ ខែឧសភា ឆ្នាំ២០២៤នេះថា ថ្ងៃនេះមណ្ឌលសុខភាពជ្រោយចង្វារ បានសហការ​ជាមួយ​អាជ្ញាធរ​សង្កាត់ជ្រោយចង្វារ និងអ្នកស្ម័គ្រចិត្តទ្រទ្រង់ភូមិ ចុះអប់រំស្រាវជ្រាវជំងឺ​មិនឆ្លង​ក្នុង​ចំណោម​បង​ប្អូនប្រជាពលរដ្ឋគោលដៅ ដែលមានអាយុចាប់ពី៤០ឆ្នាំឡើងទៅ ដូចជា៖ ជំងឺលើស​សម្ពាធ​ឈាម និងជំងឺទឹកនោមផ្អែម ឆាប់បានស្វែងរកឃើញករណីជំងឺមិនឆ្លងនេះ ដើម្បីធ្វើ​ការ​អន្តរាគមន៍​ព្យាបាលបានទាន់ពេលវេលា។ ក្រៅពីនោះមណ្ឌលសុខភាពជ្រោយចង្វារ ក៏មានផ្តល់​សេវា​ពិគ្រោះជំងឺទូទៅ សង្រ្គោះបឋម ពិនិត្យផ្ទៃពោះមុនសម្រាល ពន្យាកំណើតទំនើប និងសម្ភព ជា​ពិសេសអ្នកជំងឺក្រីក្រ និងជនពិការ ត្រូវបានបង់ថ្លៃសេវាជំនួសក្នុងការពិនិត្យពិគ្រោះ និង​ព្យាបាល​ជំងឺ​ដោយរាជរដ្ឋាភិបាលកម្ពុជា។

ចំណែកលោក កែវ ចេន មន្រី្តគម្រោង NCD របស់អង្គការRACHA(រ៉ាឆា) បានឲ្យដឹងថា ជាក់​ស្តែង​ថ្ងៃ​នេះ​យើងបានរៀបចំវេទិកាផ្សព្វផ្សាយសុខភាពជូនប្រជាពលរដ្ឋ ហើយកម្មវិធីខាងលើនេះ ក៏​ទទួលបានការឧបត្ថម្ភពីអង្គការយូនីសេហ្វ ផ្តល់ជូនមកអង្គការRACHA ដើម្បី​ធ្វើ​ការងារ​តាម​សហគមន៍​ក្នុងមូលដ្ឋានរាជធានីភ្នំពេញ ដោយអនុវត្ត​លើកា​រិយាល័យ​សុខាភិបាល​ស្រុក​ប្រតិបតិ្ត​ចំនួ​ន​៣ គឺការិយាល័យសុខាភិបាលស្រុកប្រតិបតិ្តមេគង្គ ការិយាល័យ​សុខាភិបាល​ស្រុក​ប្រតិបតិ្ត​សែនសុខ និងការិយាល័យសុខាភិបាលស្រុកប្រតិបតិ្តពោធិ៍សែនជ័យ។

ជាមួយគ្នានោះដែរបងប្អូនប្រជាពលរដ្ឋ មានវ័យចាប់​ពី​៤០​ឆ្នាំ​ឡើង​ទៅ​បាន​មក​ទទួល​សេវា​ពីក្រុមការងារ​គ្រូពេទ្យមណ្ឌលសុខភាពជ្រោយចង្វារ បានបង្ហាញចំណាប់​អារម្មណ៍​សប្បាយ​រីករាយ​ជា​ខ្លាំង ដែលមន្រី្តសុខាភិបាល បានយកចិត្តទុកដាក់ ចុះមកពិនិត្យសុខភាពជូនដោយឥតគិតថ្លៃ។

ស្របពេលដែលអាកាសធាតុមានការប្រែប្រួលនិងឡើងកម្តៅ លោកស្រីប្រធានមណ្ឌល​សុខភាព​ជ្រោយ​ចង្វារ សូមអំពាវនាវដល់បងប្អូនប្រជាពលរដ្ឋទាំងអស់ ពិសារទឹកឲ្យបានច្រើន ជាពិសេស​កុមារ ស្លៀកសំលៀកបំពាក់ឲ្យរលុងៗ និងព្យាយាមនៅក្នុងម្លប់ឲ្យបានច្រើន និងរបប​អាហារ​ក៏​ជាកត្តា​សំខាន់ផងដែរ ញ៉ាំស្អាត ហូបស្អាត ផឹកស្អាត និងរស់នៅស្អាត៕ អត្ថបទ រដ្ឋា