ការសម្រេចចិត្តភ្លាមៗរបស់លោក Elon Musk ក្នុងការបញ្ឈប់បុគ្គលិកដែលដំណើរការអាជីវកម្មសាកថ្ម ឬបញ្ចូលថាមពលរថយន្តអគ្គិសនី (EV) របស់ក្រុមហ៊ុន Tesla បានធ្វើឲ្យប៉ះពាល់ភ្លាមៗដល់បណ្ដាក្រុមហ៊ុនផលិតរថយន្ត ក្នុងការត្រៀមរៀបចំឧបករណ៍ថ្មី ដើម្បីឲ្យអតិថិជនប្រើប្រាស់បណ្តាញ Tesla Supercharger (ឧបករណ៍បញ្ចូលថាមពលលឿនខ្លាំង)។ នេះបើតាមការលើកឡើងរបស់មន្ត្រីឧស្សាហកម្ម និងអ្នកវិភាគ កាលពីថ្ងៃអង្គារ (ទី៣០ ខែមេសា)។

សម្រាប់ពេលនេះ ក្រុមហ៊ុន General Motors (GM), Ford និងក្រុមហ៊ុនផលិតរថយន្តផ្សេងទៀតដែលបានចុះកិច្ចព្រមព្រៀងក្នុងឆ្នាំ២០២៣ ដើម្បីផ្តល់ឲ្យអតិថិជននូវលទ្ធភាបប្រើប្រាស់បណ្តាញនេះ បាននិយាយថា ពួកគេមិនកែប្រែផែនការរបស់ខ្លួននោះឡើយ។

ការសម្រេចរបស់ក្រុមហ៊ុន Tesla ក្នុងការបើកបណ្តាញរបស់ខ្លួន ដើម្បីប្រជែងជាមួយបណ្ដាក្រុមហ៊ុនផលិតរថយន្ត EV ត្រូវបានសាទរដោយប្រធានាធិបតីសហរដ្ឋអាមេរិកលោក Joe Biden និងបានបើកផ្លូវឲ្យក្រុមហ៊ុន Tesla ទទួលបានការឧបត្ថម្ភធនពីសហព័ន្ធ ដើម្បីយកទៅពង្រីកលទ្ធភាពនៃប្រព័ន្ធស្តង់ដារសាកថ្មនៅអាមេរិកខាងជើង (Nacs)។

យោងតាមអតីតបុគ្គលិក ២នាក់ និងការបង្ហោះជាច្រើន នៅលើគេហទំព័រ LinkedIn បានឲ្យដឹងថា ការសម្រេចចិត្តរបស់លោក Musk ក្នុងការបញ្ចប់តួនាទីប្រធានអាជីវកម្ម គឺលោកស្រី Rebecca Tinucci និងបុគ្គលិកភាគច្រើន ឬទាំងអស់ដែលដំណើរការ និងថែទាំប្រព័ន្ធនេះ បានធ្វើឲ្យមន្ត្រីនៅក្រុមហ៊ុនផលិតរថយន្ត និងអ្នកផ្គត់ផ្គង់ Tesla ស្ថិតក្នុងភាពមិនច្បាស់លាស់អំពីអនាគតរបស់ខ្លួន។ ក្រុមហ៊ុន Tesla មិនបានឆ្លើយតបនឹងសំណើសុំការអត្ថាធិប្បាយនោះឡើយ៕